Óskemen qalalyq №2 soty Qairat Satybaldynyń jazanyń ótelmegen bóligin neǵurlym jeńil jazaǵa aýystyrý týraly ótinishin qarady. Bul týraly sottyń baspasóz qyzmetinen málim boldy.
Sot úkimimen Satybaldy senip tapsyrylǵannyń múlkin jymqyrý, urlyq jasaý maqsatynsyz zalal keltirý boiynsha múlki tárkilenip, memlekettik qyzmet atqarý quqyǵynan 10 jylǵa deiingi merzimge aiyra otyryp, 6 jylǵa bas bostandyǵynan aiyrý jazasyna sottalǵan.
Ol óziniń ótinishhatynda jazasynyń ótelmegen bóligin neǵurlym jeńil túrine aýystyrý týraly ótinishhatyn berý úshin zańnyń barlyq talaptaryn oryndaǵanyn atap kórsetken.
«Sottalǵan ótinishhatyn qoldap, ony qanaǵattandyrýdy surady. Negiz retinde óziniń oń minezdemesin, úkim boiynsha zalaldyń ornyn toltyrǵanyn, sondai-aq jalpy somasy 700 mlrd teńgeden astam múlikti jáne ózge de qarajatty óz erkimen memleketke qaitarǵanyn aitty. Túzeý mekemesiniń ókili sottalýshynyń ótinishhatyn qoldady.
Prokýror da Satybaldynyń ótinishhatyn qanaǵattandyrýdy surap, onyń jazany aýystyrý úshin barlyq sharttardy oryndaǵanyn, sondai-aq memleketke óz erkimen ózge de múlikti bergenimen negizdedi», - delingen sot aqparatynda.
Atap aitqanda, QK-niń 73-baby aýyrlyǵy ortasha qylmystar nemese aýyr qylmystar úshin sottalǵan adamdy jazanyń ótelmegen bóliginiń qalǵan bóligin mynadai jaǵdailarda neǵurlym jeńil jaza túrimen almastyrý múmkindigin kózdeidi:
- - jaza merziminiń keminde 1/3 bóligin ótegennen keiin;
- - keltirilgen zalal tolyq ótelgen jaǵdaida;
- - jazany óteý tártibin qasaqana buzý jaǵdailarynyń bolmaýy.
Satybaldy ortasha aýyr qylmys jáne aýyr qylmys jasaǵan. Ol jazanyń 1/3 bóliginen astamyn ótegen. Túzeý mekemesiniń ákimshiligi sottalǵanǵa qatysty oń sipattamasyn bergen.
«Qylmyspen keltirilgen zalal tolyǵymen ótelgen. Sot úkimimen óndirip alynǵan somalar (is júrgizý shyǵyndary, májbúrli tólem) tólengen.
Joǵaryda aitylǵandardyń negizinde sot sottalýshynyń ótinishhatyn qanaǵattandyrdy jáne bas bostandyǵynan aiyrý túrindegi jazanyń ótelmegen bóligin 3 jyl 3 ai 7 kún merzimge bas bostandyǵyn shekteýge aýystyrdy», - dep atalyp ótken sot aqparatynda.
Q.Satybaldyǵa probatsiialyq baqylaý belgilendi. Turaqty jumysy bolmaǵan jaǵdaida, sottalǵan jazany óteýdiń barlyq merzimi ishinde jyl saiyn 100 saǵattan májbúrli eńbekke tartylady.
Sot qaýlysymen oǵan mynadai mindetter júktelgen:
- Sottyń qaýlysy turǵylyqty jeri boiynsha probatsiia qyzmetine zańdy kúshine engen kúnnen bastap 10 kún ishinde esepke qoiý úshin kelý, sottalǵan adamnyń (probatsiia qyzmetiniń) minez-qulqyn baqylaýdy júzege asyratyn ýákiletti memlekettik organdy habardar etpei turaqty turǵylyqty jerin, jumysyn, oqýyn aýystyrmaý, basqa da mindetterdi oryndaý sottalǵandy túzeýge jáne onyń jańa qylmystyq quqyq buzýshylyqtar jasaýynyń aldyn alýǵa yqpal etedi.
Sot qaýlysy zańdy kúshine engen joq.
Budan buryn habarlanǵandai, Qairat Satybaldy isi boiynsha memleketke 732,8 mlrd teńgeniń aktivteri qaitaryldy.
Jaqynda ol memleketke taǵy 50 mlrd teńgeden astam aktivin qaitaratyny belgili boldy.
