Kedendik statistikadaǵy alshaqtyqtardy tómendetýge qatysty sapaly ózgerister joq. Bul týraly QR Parlamenti palatalarynyń birlesken otyrysynda Respýblikalyq biýdjettiń atqarylýyn baqylaý jónindegi esep koitetiniń tóraiymy Natalia Godýnova aitty, dep habarlaidy QazAqparat.
«Salyqtyq jáne kedendik ákimshilendirýdi jaqsartýda rezervter bar. Salyqtyq tekserýlerdiń nátijeliligin arttyrýǵa, kedendik statistikadaǵy alshaqtyqtardy tómendetýge qatysty sapaly ózgeristerdi biz kórip otyrǵan joqpyz. Artyq tólem máseleleri de sheshilmegen. Bul rette ýákiletti memlekettik organ aýditke de, Májilis depýtattaryna da, Senat depýtattaryna da eskertýlerdi túsindire almady. Biraq ózin baspasózde aqtap shyǵýdy qajet dep tapty. Shamasy, máseleniń kúrdeliligine senip, oqyrmandar kásibi deńgeide tolyq túsinbeidi dep oilaǵan shyǵar. Biraq, ókinishke orai, anyqtalǵan kemshilikter men buzýshylyqtardy jasyra almaisyń. Zańǵa sáikes olardyń barlyǵy aýditorlyq dáleldermen rastalǵan»,- dedi komitet tóraiymy.
Bul rette Natalia Godýnova ashyqtyqty, esep berýdi arttyrý jáne memlekettiń bizneske kómek kórsetý tetikterin qaita qaraý arqyly fiskaldyq saiasat reformasyn iske asyrý qajettigin basa aitty.
«Atap aitqanda, tiimsiz salyq jeńildikteriniń kúshin joiý jáne olardy júieleý, kóleńkeli ekonomikaǵa jáne salyq mindettemelerin oryndaýdan jaltarýǵa qarsy dáiekti kúres júrgizý arqyly salyq bazasyn keńeitý jóninde is-sharalar qabyldaý kerek. Esep komiteti birneshe ret biýdjettik táýekelderdi basqarý júiesin engizý jáne memlekettik qarjynyń uzaq merzimdi turaqtylyǵy qujatyn ázirleý máselesin qaraý qajettiligine nazar aýdarǵan bolatyn», - dedi ol.
