Videodan alynǵan kadr: KTK
Kcell kompaniiasy Túrkistan oblysynyń Qazyǵurt aýdanyna qarasty Aqqum aýylynda internettiń sapasyz bolý sebebin atady, dep habarlaidy QazAqparat.
«Qazyǵurt aýdany Altyntóbe aýyldyq okrýgi Aqqum eldi mekenine 2020 jyldyń jeltoqsan aiynda Kcell operatorynyń bazalyq stantsiiasy ornatylǵan bolatyn. Ókinishke qarai, jer bederiniń kúrdeliligine jáne jerdegi transmissiianyń bolmaýyna bailanysty – sol kezdegi bailanyspen qamtýdyń jalǵyz múmkin bolar joly spýtnik arqyly qosylý edi. Spýtniktik transmissiiada derekterdi berý arnasy sapaly internet bailanysyn qamtamasyz etýge jetkiliksiz», - dep atap ótedi kompaniia agenttik tilshisiniń saýalyna orai.
Bailanys operatory abonentteriniń jyldam internetke degen qajettiligin túsinetinin jáne osy baǵytta qajetti áreketterdi júzege asyryp kele jatqanyn málimdedi.
«Naqtyraq aitqanda, qazirgi ýaqytta jergilikti atqarýshy organmen uiymdastyrý máselelerin sheship jatyr. Bailanys operatory óz qurylǵylaryn ornatýy úshin jergilikti atqarýshy organdar infraqurylymmen, iaǵni antenna-dińgek qurylysyn salyp, ony elektr energiiasymen qamtamasyz etýi tiis. Sonda ǵana bailanys operatory radiorelelik kópirdi iske asyrýǵa jáne aýyldy sapaly mobildi internetpen qamtamasyz etýge múmkindik alady», - dedi kompaniiadan.
