Britandyq «Times Higher Education» (THE) agenttiginiń zertteý nátijesi boiynsha ál-Farabi atyndaǵy QazUÝ Ortalyq Aziia ýniversitetteri arasynda birinshi ári jalǵyz bolyp «THE World University Rankings-2019» reitinginde álemniń úzdik JOO-larynyń 801-1000 tobyna endi. Jalpy bul reiting tiziminde 86 elden 1250 ýniversitet bar, dep habarlaidy "Ult aqparat" ýniversitettiń baspasóz qyzmetine silteme jasap.
TNE reitingi 2010 jyly «Global Institutional Profiles Project» jahandyq jobasy aiasynda «Times Higher Education» jáne «Thomson Reuters» birlese jasaǵan, ýniversitetterdiń barynsha yqpaldy ǵalamdyq reitingisi sanalady.
TNE reitinginiń airyqsha ereksheligi - baǵalaý kriteriileriniń basym bóliginiń ýniversitettegi ǵylymi-zertteý jáne innovatsiialyq qyzmetterge baǵyttalýynda. Barynsha tolyq ári úilesimdi salystyrýmen qamtý úshin: zertteý jáne bilim berý qyzmeti, bilim transferti jáne innovatsiiaǵa úles, internatsionaldandyrý, ǵalymdardyń ǵylymi maqalalarynyń jariialanýy, halyqaralyq qarym-qatynas siiaqty bes baǵyt boiynsha 13 indikator qoldanylady.
AQSh jáne Ulybritaniia ýniversitetteri TNE reitinginde dástúrli túrde kósh bastap keledi. QazUÝ halyqaralyq reitingilerde serpindi alǵa basýda, buǵan bilim ordasynyń álemdik deńgeidegi zertteý ýniversitetine tabysty transformatsiialanýy óz septigin tigizýde. Elimizdegi jetekshi ýniversitettiń jańa jetistikteri joǵary oqý ornynyń jáne jahandyq ǵylym-bilim berý keńistigindegi Qazaqstannyń joǵary bilim berý júiesiniń joǵary básekege qabilettiligin ańǵartady.
Aita ketý kerek, 2019 jyldyń qyrkúiek aiynda ál-Farabi atyndaǵy QazUÝ «QS World University Ranking» Halyqaralyq reitinginde 220-shy oryndy ielengen, «Great Value Colleges» halyqalalyq uiymynyń málimetine sáikes álemniń tehnologiialyq turǵyda eń damyǵan top-50 ýniversitetteri qatarynda, sondai-aq «UI Green Metric Ranking of World Universities» reitinginde álemniń top-200 «jasyl» ýniversitetterine kiredi.
