Foto: Akorda.kz
Memleket basshysy «Qazposhta» AQ basqarma tóraǵasy Ásel Janasovany qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke «Qazposhta» aktsionerlik qoǵamynyń biylǵy 8 aida atqarǵan jumystarynyń nátijesi jóninde baiandaldy. Atap aitqanda, kompaniia shyǵyndardy ońtailandyrý, elektrondy kommertsiiany jáne basqa da qarjylyq qyzmetterdi damytý esebinen sońǵy 5 jylda alǵash ret shyǵyny az, tabysty mekemege ainalyp otyr. «Qazposhtanyń» 8 aidaǵy kirisi ótken jyldyń osy kezeńimen salystyrǵanda 44 paiyzǵa nemese 16,7 milliard teńgege artty.
Ásel Janasovanyń aitýynsha, elimizdiń shalǵai eldi mekenderinde «Qazposhtanyń» bólimsheler jelisin keńeitý josparlanyp otyr. Bul poshta, qarjy, agenttik, áleýmettik jáne memlekettik qyzmetterdi qamtamasyz etýge múmkindik beredi.
Memleket basshysyna «Qazposhta» aktsionerlik qoǵamy elektrondy kommertsiia naryǵynyń sýbektileri úshin biryńǵai ekojúie quratyny jóninde málimet berildi. Ol úshin kompaniia fýlfilment ortalyqtaryn damytý, otandyq jáne sheteldik tanymal marketpleister úshin tapsyrystar berý pýnktterin ashý, qoimalar men poshtamat jelilerin keńeitý jumystaryn júrgizip jatyr.
Sonymen qatar Prezidentke Aqtóbe qalasynda, Túrkistan jáne Almaty oblystarynda logistikalyq hab salý jospary tanystyryldy. Mundai logistikalyq hab osy aptada Astana qalasynda ashylmaq.
Kezdesý sońynda Qasym-Jomart Toqaev kompaniianyń qarjylyq jaǵdaiyn jaqsartý jumystaryn jalǵastyrýdy, aýyl turǵyndaryna kórsetiletin áleýmettik jáne memlekettik qyzmetter aiasyn ulǵaitýdy tapsyrdy.
