Kollaj: Halyq Uni
«QazMunaiGaz» UK» AQ basqarma tóraǵasy Maǵzum Myrzaǵaliev pen Energetika vitse-ministri Jandos Nurmaǵanbetovke sógis jariialanady. Bul týraly Memleket basshysynyń qabyldaýynda bolǵan Premer-Ministr Álihan Smaiylov málim etti, dep habarlaidy "Ult aqparat".
Smaiylovtyń aitýynsha, batys óńiriniń energetika júiesiniń jai-kúiine jasalǵan aýqymdy taldaý nátijesinde energetika kásiporyndarynyń jumysynda birqatar kemshilik jiberilgeni anyqtalǵan. Budan bólek Energetika ministrliginiń, «KEGOC» AQ, «MAEK» JShS jáne «QazMunaiGaz» UK» AQ jumysynda olqylyqtar bar ekeni málim bolǵan.
«QazMunaiGaz» UK» AQ basqarma tóraǵasy Maǵzum Myrzaǵalievke munai óńdeý zaýytynyń qaýipsiz jáne turaqty jumysyn qamtamasyz etý sharalaryn ýaqtyly júzege asyrmaǵany úshin sógis beriledi.
Budan bólek, batys energiia torabynyń qaýipsizdigine tiisti deńgeide baqylaý jasamaǵany úshin Energetika vitse-ministri Jandos Nurmaǵanbetovke sógis jariialaý jóninde sheshim qabyldandy.
Sondai-aq «MAEK» JShS, AMÓZ, «KEGOC» AQ basshylary men laýazymdy tulǵalaryna qatysty ákimshilik sipattaǵy sharalar qoldanylady» - delingen Aqordanyń resmi saityndaǵy aqparatta.
Úkimet keleshekte mundai daǵdarys jaǵdailaryna jol bermeý úshin Mańǵystaý atom energetikalyq kombinatyna jańǵyrtý jáne kúrdeli jóndeý júrgizý, batys energetikalyq aimaǵyn kúsheitý, Atyraý munai óńdeý zaýytyn syrtqy elektr qýatymen turaqty qamtamasyz etý jáne sol jerde ózin-ózi energiiamen qamtamasyz etetin stansa salý, batys aimaǵyn Qazaqstannyń biryńǵai elektrenergetikalyq júiesine qosý jumystaryn jáne basqa da birqatar shuǵyl jáne júieli sharalardy júzege asyrady.
