Biyl Qyzylorda jáne Túrkistan oblystarynyń aýyl sharýashylyǵy taýar óndirýshilerin sýmen qamtamasyz etý boiynsha birqatar problemalar týyndaýy múmkin, dep habarlaidy QazAqparat.
Ekologiia, geologiia jáne tabiǵi resýrstar ministrliginiń redaktsiia saýalyna joldaǵan jaýabynda osyndai málimet aitylǵan.
«Aǵymdaǵy jyly respýblikanyń ońtústik aýmaǵy boiynsha sý azdyǵy saqtalady. «Qazgidromet» RMK gidrologiialyq boljamyna sáikes 01.03.2021 jylǵy jaǵdai boiynsha Jambyl jáne Túrkistan oblystarynyń taýlarynda ylǵal jinaqtaý kezeńindegi jaýyn-shashyn mólsheri ortasha kóp jyldyq mánderden 29-48%-ǵa, Almaty oblysynda ortasha kóp jyldyq mánderden 8-42%-ǵa az. Jambyl jáne Túrkistan oblystarynyń taý ózenderiniń basseinderindegi qar qory ortasha kóp jyldyq mánderden 32-88%-ǵa, Almaty oblysynda ortasha kóp jyldyq mánderden 24-41%-ǵa az», - delingen vedomstvo jaýabynda.
Syrdariianyń joǵary jaǵynda ornalasqan Qyrǵyzstan men Ózbekstan mamandarynyń da boljamy osyǵan uqsas.
«Qyrǵyzgidromet» málimetterine sáikes, 2020 jylǵy 1 qazannan bastap 2021 jylǵy 28 aqpanǵa deiingi kezeńde jaýyn-shashynnyń jinaqtalýy aýmaqtyń kóp bóliginde normadan 30-79%-ǵa kem jáne aitarlyqtai az boldy. Mysaly, 2021 jylǵy 25 naýryzdaǵy jaǵdai boiynsha Shý-Talas basseini boiynsha Kirov sý qoimasynyń (Qyrǵyz Respýblikasy) kólemi ótken jylmen salystyrǵanda 110 mln tekshe metrge az. Sonymen qatar, Syrdariia ózeniniń joǵary aǵysynda ornalasqan Toqtoǵul sý qoimasynyń (Qyrǵyz Respýblikasy) kólemi ótken jylmen salystyrǵanda 3 000 mln tekshe metrge kem», - deidi ministrlik mamandary.
Ózbekstandaǵy jaǵdai da osyndai. «Ózgidromet» málimetteri boiynsha, 2021 jyldyń vegetatsiialyq kezeńinde Ferǵana alqabynyń ońtústigindegi ózenderdiń sýlylyǵy 90-100% saqtalady degen boljam bar. Alaida Narynnyń sýlylyǵy 80-90%, Qaradariiada 70-80%, Shyrshyq, Ahangaran ózenderinde 70-75%, Ferǵana alqabynyń soltústigindegi ózenderde 65-75% shamasynda kútilip otyr.
«Osyǵan bailanysty vegetatsiia kezeńinde Syrdariia ózeniniń joǵary aǵysyndaǵy elderden qajetti sý kólemi kelmeýi múmkin. Sonyń saldarynan Qyzylorda jáne Túrkistan oblystarynyń aýyl sharýashylyǵy taýar óndirýshilerin sýarmaly sýmen qamtamasyz etý boiynsha birqatar problemalar týyndaýy múmkin», - dep jazady ministrlik mamandary.
