Soltúsik Qazaqstan oblysynda politseiler «Qazan» jáne «Qara kassa» qarjy oiyndary boiynsha eki qylmystyq is qozǵap, tergeýdi bastady, dep habarlaidy "Ult aqparat".
SQO Politsiia departamenti baspasóz qyzmetiniń málimetinshe, Petropavl qalalyq politsiia basqarmasyna WhatsApp tobyna kirip, oiynǵa qosylý úshin 14 myń 300 teńgesin bergen áielden aryz tústi. 60 jastaǵy turǵyn osylaisha qosymsha tabys tappaq bolǵan.
Esterińizge salaiyq, «Qazan», «Qara kassa» qarjy oiyndary Qazaqstanda aqpan aiynda messendjerlerde bastalǵan edi. Onyń talaby boiynsha, oiynǵa qatysý úshin 14 myń 300 teńge tólem jasap, ózimen birge eki adamdy tartý qajet. Olar da kassaǵa sonsha aqsha salýy tiis.
Aryzdanýshy áieldiń aitýynsha, chatqa shaqyrǵan toptyń ákimgeri qajetti qatysýshyny jinaǵannan keiin ózi shyǵyp ketken. Qalǵandary ýáde etilgen aqshany aqyrynda ala almaǵan.
Kókshetaý qalasynyń turǵyny da Petropavlda turatyn boijetkenge senip qalǵan. Bul oqiǵa boiynsha da «Alaiaqtyq» deregi boiynsha sotqa deiingi tergeý bastaldy.
«Kúmándi kórinse, ári aqsha salý qajet bolsa, sol aqshańyzdy keiin kórmeýińiz múmkin ekenin túsinýińiz qajet. Ońai jolmen aqsha tappaq bolǵandar alaiaqtardyń qurbanyna ainalýda. Tek aqshańyzdan airylyp qoimai, kúdiktilerdiń sanatyna da enýińiz múmkin. Politsiia qyzmetkerleri buǵan deiin aitqandai, bul eki oiynda qarjy piramidasynyń belgileri bar», - deidi SQO Politsiia departamenti bastyǵynyń orynbasary Eńbek Sembin.
Mamandardyń aitýynsha, mundai qarjy oiyndarynda alǵashqylardyń biri bolyp tirkelgender ǵana paida kóredi. Qalǵandary salǵan aqshalarynan aiyrylýlary múmkin. Alaida, bul týraly qansha aitylyp, eskertilgenimen qarjy piramidasyna tirkelip, ońai aqsha tapqysy keletinderdiń sany azaimai otyr.
Qarjy piramidasyn quryp, basqarǵandarǵa 10 jylǵa deiin bas bostandyǵynan aiyrý jáne dúnie-múlkin tárkileý jazasy qarastyrylǵan.
