Foto: QyzPU baspasóz qyzmeti
Búgin Qazaq ulttyq qyzdar pedagogikalyq ýniversitetinde belgili qoǵam qairatkeri, til janashyry, QyzPU túlegi Orazkúl Asanǵazyqyzynyń «Otbasy berekesi» atty jańa kitabynyń tanystyrylymy ótti, dep habarlaidy Ult.kz.
Aitýly sharaǵa ýniversitettiń Basqarma Tóraǵasy – Rektory Gúlmira Qanai, professorlyq-oqytýshylyq quram men stýdentter, qoǵam qairatkerleri, Orazkúl Asanǵazynyń týystary, dostary jáne zamandastary qatysty.
Kitaptyń tusaýkeser rásimine Basqarma Tóraǵasy – Rektory Gúlmira Qanai, jazýshy, pedagogika ǵylymdarynyń doktory Sovet-Han Ǵabbasov, Qazaqstannyń eńbek sińirgen qairatkeri, qazaqtyń aiaýly aqyn qyzy Aqushtap Baqtygereeva, zań ǵylymdarynyń doktory Jalairi Ómiráli Shakarapuly, tarih ǵylymdarynyń doktory, professor Qoigeldi Mámbet Quljabaiuly qatysyp, kitaptyń qyzyl lentasyn qidy.
Asanǵazy Orazkúl Asanǵazyqyzy – qoǵamda óz orny bar, ulttyń tili, dástúri jáne mádenietin saqtaý jolynda belsendi qyzmet etip kele jatqan kórnekti tulǵa. Bul kitap jastarǵa ulttyq qundylyqtardy nasihattaý, otbasy berekesin saqtaý jáne urpaq tárbiesine úlken jaýapkershilikpen qaraý qajettiligin túsindirý maqsatynda jazylǵan.
«Men alǵashynda «Otbasy berekesi» taqyrybynda dáris oqyp júrdim. Keiin osy dáristerimdi jinaqtap, kitap etip shyǵardym. Kitap úsh taraýdan turady: «Otan otbasynan bastalady», «Otbasy berekesi mahabbatta», «El búginshil, meniki erteń úshin...». Iaǵni, dáristerimde qoldanǵan áńgimelerimdi óz ómirlik tájiribemmen sabaqtastyryp jazdym. Kitaptyń eń basty ereksheligi – onyń ómirsheńdigi. Ol otbasy qurýdy josparlaǵan jastarǵa da, ómirdiń talai belesin artqa tastaǵan qariialarǵa da arnalǵan», - dedi Orazkúl Asanǵazyqyzy.
Foto: QyzPU baspasóz qyzmeti
«Otbasy berekesi» kitaby – ulttyq tárbie men otbasylyq qundylyqtardy dáripteitin mańyzdy eńbek. Kitapta qazaq otbasyndaǵy tárbieniń mańyzy, ata-ana róli, urpaqtar sabaqtastyǵy jáne otbasyndaǵy berekeniń saqtalýy týraly oilar men usynystar qarastyrylǵan.
«Kitapty oqyp shyqtym. Bolashaq jastar úshin naǵyz baǵdarsham desem, artyq aitqanym emes. Kitapty oqi otyryp, avtorymen suqbattasyp otyrǵandai áser aldym. Keibir ómirlik suraqtaryma osy týyndy arqyly jaýap taptym. Qazaqtyń tektilik máselesi tereńinen talqylanǵan qundy eńbek. Barshańyzǵa oqýǵa keńes beremin!», - dedi Qazaq ulttyq qyzdar pedagogikalyq ýniversitetiniń qaýymdastyrylǵan professory Aisulý Kenjan Molynbaiqyzy.
Kesh barysynda kitaptan úzindiler oqylyp, avtordyń oilary men týyndysynyń negizgi ideialary talqylandy. Sonymen qatar qatysýshylar kitaptyń ózektiligi men otbasy tárbiesiniń qazirgi qoǵamdaǵy orny týraly pikir almasyp, rýhani jańǵyrýdy qamtamasyz etý joldary jaily sóz qozǵady.
Orazkúl Asanǵazyqyzynyń «Otbasy berekesi» kitaby – otbasy qundylyqtaryn nasihattaityn qundy týyndy. Bul kitap tek jastarǵa ǵana emes, otbasylyq ómirdiń mánin tereńinen uǵynǵysy keletin árbir janǵa arnalǵan.
