Foto:gov.kz
Ózge elder bizdi kóshpendilerdiń urpaǵy retinde biledi. Bul da – halqymyzdyń basty brendiniń biri.
Sonyń bir kórsetkishi elimizde ótken V Dúniejúzilik kóshpendiler oiyndary. Kóshpendiler órkenieti dúniejúzi tarihynda óshpes iz qaldyrdy. Memleket basshysy bul sharany babalar amanatyn jas býynǵa tabystaýdy maqsat etken joba ekenin aitty.
«Kóshpendiler bes myń jyl buryn jylqyny qolǵa úiretti. Dúnieni dúbirletken salt attylar mádenietin qalyptastyrdy. Qýatty qarý-jaraq pen ǵajaiyp zergerlik buiymdar jasap shyǵardy. Saq dáýiriniń Altyn adamdary – sonyń aiqyn dáleli», - deidi Memleket basshysy.
Keshegi aitýshy shara - ejelgi kóshpendi halyqtardyń sporttyq dástúrleri men mádenietin dáripteýge aitarlyqtai úles qosty. Bizdiń ótken ómirimizden syr shertetin kóshpendi halyqtardyń mádeni murasyn, salt-dástúrlerin qaita jańǵyrtyp, halyqaralyq deńgeide eldiń imidjin kóterýge oń yqpal etti.
Memleket basshysy osy sátti tiimdi paidalanyp, qazaq jerinen Ál-Farabi, Qoja Ahmet Iasaýi syndy ǵulamalar shyqqanyn, olar ilim-ǵylymnyń damýyna orasan zor úles qosqanyn aitty.
Qazaq jerinde ótip jatqan bairaqty báseke «kóshpendiler olimpiadasy» degen ataqqa ie boldy. Bul oiyndar dala órkenietin jer jahanǵa pash etip, elimizdiń mereiin odan saiyn asqaqtata tústi. Qazaqtyń ulttyq sport túrleri bizdiń tereń tarihymyzdan syr shertedi.
Ejelgi zamannan beri qalyptasqan kókpar, báige, aýdaryspaq, jamby atý sekildi sport túrleri kóshpendilerdiń ómir saltymen tikelei bailanysty. Olardyń jaýyngerlik óneri, shydamdylyǵy jáne eptiligi ulttyq sport oiyndarynda kórinis taýyp otyr. Osyndai tereń filosofiialyq oidy ashylý saltanatyndaǵy qoiylymdarda jaqsy kóresete bilgen.
Prezident aitqandai, Qazaqstan búkil álemge beibitshilik pen kelisim mekeni retinde tanymal el. Elimizde túrli etnos ókilderi tatý-tátti ómir súrip jatyr. Biz alys-jaqyn sheteldiń bárimen tyǵyz bailanys ornattyq. Basqa memleketter de ózara dostyq qatynasta bolǵanyn qalaimyz.
Sondyqtan Kóshpendiler oiyndary yntymaǵymyzdy bekemdei túspek. Biylǵy dodaǵa Aziia men Eýropadan, Soltústik jáne Ońtústik Amerikadan, Afrikadan, sondai-aq Avstraliiadan sportshylar keldi. Tórt qurlyqtaǵy tórt myńnan astam sportshynyń basyn qosqan dúbirli dodada qatysýshylar sporttyń 20 túrinen baq synasty. Bes nysanda 110 medal jiyntyǵy sarapqa salyndy.
Rasyn aitý kerek, biylǵy doda erekshe boldy. Eske alyp, birneshe jyl aityp júretin bairaqty básekege ainaldy desek qatelespeimiz.
Jarys qorytyndysy boiynsha Qazaqstan top bastady. Bizdiń sportshylarymyz 114 medaldi qanjyǵasyna bailady. Sonyń 44-i altyn, 33-i kúmis, 37-i qola júlde. Elimizdiń atynan 21 sport túri boiynsha 216 sportshy qatysty.
Jabylý saltanatynda Halyqaralyq ulttyq sport konfederatsiiasynyń basshysy Bilál Erdoǵan sóz sóiledi. Anadolydan kelgen maman osyndai ádemi saiys uiymdastyrǵany úshin Qazaqstan tarapyna alǵys aitty. Elimizdiń ulttyq sport túrlerin damytýdaǵy rólin joǵary baǵalady.
Sondai-aq Anadolydan kelgen meiman kóshpendiler oiyndary mádeni muraǵa bai ekenin dáleldegenin jetkizdi. Munyń elementteri ashylý saltanatynda da, jabylý rásiminde de kórinis tapqanyn atap ótti.
Bilál Erdoǵan kóshpendiler oiyny tek qana sporttyq báseke emes, baýyrlastyqty nasihattaitynyna nazar aýdardy. Sóz sońynda osyndai saiys ótkizýge múmkindik bergen Qasym-Jomart Toqaevqa jáne Qazaqstan halqyna alǵysyn bildirdi.
Budan bólek, jabylý saltanatynda Qyrǵyzstannyń mádeniet, aqparat jáne týrizm ministri Altynbek Maksýtov ta júrek jardy tilegin bildirdi. Osyndai bairaqty básekeni abyroimen ótkizgen Qazaqstan tarapyna alǵysyn jetkizdi. Rásim sońynda Kóshpendiler oiyndaryn ótkizý estafetasy simvoldyq turǵyda Qyrǵyzstanǵa tabys etildi. Osylaisha, 2026 jylǵy bairaqty báseke negizin qalaýshy Qyrǵyzstanda ótedi.
Jalpy, bul oiyndar tek kóshpeli jurttyń ǵana emes, qazaq halqynyń bai mádenietin pash etti, sebebi ár oiyn adamnan tapqyrlyqty, batyldyqty, qaisarlyqty talap etedi. Biz osy oiyndar arqyly uly kóshpendiler órkenietiniń murageri ekenimizdi taǵy ber ret dáleldedik.
