Foto: QR TSM
Qazaqstanda jaǵajai maýsymynyń aiaqtalýyna bailanysty «Úzdik jaǵajai» baǵdarlamasynyń qorytyndysy shyǵaryldy, dep habarlaidy Ult.kz.
Baiqaý Kazakh Tourism bastamasymen jáne QR Týrizm jáne sport ministrligi men «Atameken» UKP qoldaýymen uiymdastyryldy. Onyń negizgi maqsaty - elimizdegi sý aidyndarynda qyzmet kórsetýdiń jáne qaýipsizdik standarttaryn arttyrý.
Biyl saraptamalyq komissiianyń nazaryna óńirlerden 30 astam jaǵajai usynyldy. Onyń ishinde jekemenshik ári qalalyq jaǵajailar boldy. Baǵalaý QR ST 3013-2017 ulttyq standartyna sáikes júrgizildi jáne halyqaralyq Blue Flag baǵdarlamasynyń jekelegen kriteriileri eskerildi.
Irikteý kezinde akvatoriianyń qaýipsizdigi, sanitarlyq jaǵdaiy men infraqurylymy, qutqarýshylar men meditsinalyq beketterdiń bolýy, sýǵa kirýdiń yńǵailylyǵy, aýmaqty josparlaý, sýdyń sapasyn turaqty túrde baqylaý jáne qoqysty bólek jinaý, kún energiiasymen jumys isteitin dýsh kabinalary, ekologiialyq bilim berý is-sharalaryn qamtityn ekologiialyq bastamalar esepke alyndy.
Saraptamalyq komissiianyń baǵalaýy boiynsha TOP-3 úzdik jaǵajaiy anyqtaldy. Olar jinaýǵa múmkin bolǵan 170 ball boiynsha joǵary kórsetkishterdi ielendi:
1. Wyndham Garden Beach (Aqmola oblysy, Býrabai k.) –166 ball;
2. №5 qalalyq jaǵajai (Almaty oblysy, Qonaev q.) – 145,5 ball;
3. Ortalyq jaǵalaý (Pavlodar oblysy, Pavlodar q.) – 145 ball.
Foto: QR TSM
Úzdik jaǵajailar taza ári qaýipsiz akvatoriiasymen, damyǵan infraqurylymymen (kiim aýystyratyn bólmeler, dýsh kabinalary, demalys aimaqtary, dámhanalar), balalarmen keletin otbasylarǵa qolailyǵymen, tabiǵatty saqtaý maqsatyndaǵy ekologiialyq sheshimderdi jáne bastamalardy qoldanýmen erekshelendi.
Sonymen qatar saraptamalyq komissiia Aqmola (Shýchinsk q., Býrabai k., Zerendi a.), Qostanai, Mańǵystaý, Atyraý, Qaraǵandy, Qyzylorda oblystaryndaǵy jaǵajailar boiynsha ótinimderdi qarady. Olar boiynsha ákimdiktermen jáne biznes qaýymdastyqpen birge ulttyq jáne halyqaralyq standarttarǵa sáikestendirý jumystaryn júrgizý josparlanǵan.
Foto: QR TSM
«Úzdik jaǵajai» baǵdarlamasy – bul elimizdiń eń úzdik jaǵajailaryn anyqtaý ǵana emes, sonymen qatar óńirlerdi ózderiniń demalys aimaqtaryn halyqaralyq standarttarǵa sáikes damytýǵa yntalandyrý. Aqmola, Atyraý, Qostanai, Qaraǵandy jáne Almaty oblystarynyń óńirlik kásipkerler palatalary men ákimdikterine belsendi áriptestik tanytyp, bizdiń bastamany qoldaǵandary úshin alǵys bildiremiz. Úzdik TOP-3 qazirgi jaǵajaidyń qandai bolýy qajet ekendigin kórsetedi: qaýipsiz, yńǵaily jáne ekologiialyq taza», - dep atap ótti «Kazakh Tourism» UK» AQ basqarma tóraǵasynyń mindetin atqarýshy Daniel Serjanuly.
«Úzdik jaǵajai» baǵdarlamasy jyl saiyn ótkiziletin bolady.
