Memleket basshysy Qasym-Jomart Toqaev Qazaqstanǵa memlekettik saparmen kelgen Qytai Halyq Respýblikasynyń Tóraǵasy Si Tszinpinmen kezdesý ótkizdi, dep habarlaidy "Ult aqparat" Aqordaǵa silteme jasap.
«Aqorda» rezidentsiiasynda QHR Tóraǵasyn resmi qarsy alý sharasy ótti. Qurmet Qaraýylynyń bastyǵy eki el basshylaryna raport berip, Qazaqstan men Qytaidyń memlekettik ánurandary oryndalǵannan keiin memleketter basshylary ekijaqty kelissóz ótkizetin zalǵa bardy.
Budan keiin Qazaqstan men Qytai basshylary keńeitilgen quramda kelissóz júrgizdi.
Prezident Qytai Tóraǵasyna shaqyrýyn qabyl alyp, elimizge memlekettik saparmen kelgenine rizashylyǵyn bildirdi.
– Bul – pandemiiadan keiin sizdiń shetelge alǵashqy saparyńyz. Sondyqtan osy saparyńyz tarihi maǵynaǵa ie. Men muny joǵary deńgeidegi ózara senim men yntymaqtastyqtyń kórinisi dep baǵalaimyn. Biylǵy 5 aqpanda XXIV Qysqy Olimpiada oiyndarynyń ashylý saltanatyna qatysqanymdy bilesiz. Sol kezde Beijińde ótken kezdesýimizdi yqylaspen eske alamyn, – dedi Memleket basshysy.
Kezdesýde Qasym-Jomart Toqaev Qazaqstan men Qytai arasynda diplomatiialyq qatynas ornaǵanyna 30 jyl tolǵanyn atap ótti.
– Sizdiń saparyńyz osy mereili beleske tuspa-tus kelip otyr. Qysqa merzim ishinde biz turaqty memleketaralyq qatynas ornattyq. Siz Qazaqstan ekonomikasyn damytýǵa jáne bizdiń halyqaralyq bastamalarymyzǵa udaiy qoldaý kórsetip kelesiz. Sol úshin ózińizge zor alǵys aitamyn, – dedi Prezident.
Qasym-Jomart Toqaevtyń aitýynsha, 2019 jylǵy qyrkúiektegi Beijińge memlekettik sapary kezinde qol jetkizilgen jan-jaqty máńgilik strategiialyq seriktestik jónindegi ýaǵdalastyq sátti júzege asyrylyp jatyr. Búgingi birlesken málimdeme qarym-qatynastardyń jańa «altyn 30 jyldyǵynyń» bastalǵanyn bildiredi. Sondyqtan Qytai Tóraǵasynyń bul sapary asa mańyzdy.
QHR Tóraǵasy araǵa jyl salyp Qazaqstanǵa qaita kelgenine qýanyshty ekenin aityp, qazaq halqynyń qonaqjailyǵy men memlekettik saparmen kelýge shaqyrǵany úshin Prezidentke rizashylyǵyn bildirdi.
Si Tszinpin qazaq-qytai qarym-qatynastarynyń damýyn joǵary baǵalap, búgingi saparynyń ekijaqty bailanystardy odan ári ilgeriletýge tyń serpin beretinin atap ótti. Onyń aitýynsha, Qytai óńirlik jáne halyqaralyq kún tártibindegi máselelerge qatysty Qazaqstannyń ustanymdaryn qoldaidy.
– Qazaqstan halqy sizdiń basshylyǵyńyzben memlekettik qurylys pen ulttyq jańǵyrý isinde jańa tabystarǵa jetetini kúmánsiz. Qytai úkimeti Qazaqstanmen aradaǵy qarym-qatynastarǵa zor kóńil bóletinin taǵy da qaitalap aitqym keledi. Halyqaralyq jaǵdai qalai ózgerse de, biz aldaǵy ýaqytta Qazaqstannyń táýelsizdigin, egemendigin jáne territoriialyq tutastyǵyn saqtaýyna qoldaý kórsetemiz. Turaqtylyq pen damýdy qamtamasyz etý jónindegi Siz júrgizip jatqan reformalardy tolyq qoldai otyryp, sizdiń elińizdiń ishki isterine qandai da bir kúshterdiń aralasýyna úzildi-kesildi qarsy bolamyz. Qytai Qazaqstannyń adal dosy jáne senimdi seriktesi boldy jáne bolyp qala beredi. Diplomatiialyq qarym-qatynastar ornaǵaly beri Qazaqstan men Qytai arasyndaǵy beriktik synynan laiyqty ótken qarym-qatynastar únemi jańa mazmunmen tolyǵyp, damýmen, jemisin berip keledi. Bizdiń elderimiz birqatar salalardaǵy yntymaqtastyqtyń avangardyna ainaldy. Shekara máselelerin alǵashqylardyń biri bolyp sheshtik. «Bir beldeý - bir jol» baǵdarlamasy aiasyndaǵy yntymaqtastyq úlgisin kórsetip, indýstriialandyrý salasyndaǵy halyqaralyq yntymaqtastyqty alǵashqylardyń biri bolyp damyttyq. Biz ekijaqty qarym-qatynastardy serpindi damytýǵa qol jetkizip, Qytai diplomatiiasynda teńdesi joq máńgilik jan-jaqty strategiialyq áriptestik deńgeiine shyǵardyq. Búginde Qazaqstan-Qytai qarym-qatynasy jańa tarihi bastaý aldy, – dedi Si Tszinpin.
Taraptar kólik-logistika, azyq-túlik ónerkásibi, aýyl sharýashylyq salalarynyń máseleleri jáne transshekaralyq ózender jaiyn talqylady.
Kelissózderden keiin eki memlekettiń basshylary Qazaqstan Respýblikasy men Qytai Halyq Respýblikasy arasyndaǵy diplomatiialyq qatynastardyń ornatylǵanyna 30 jyl tolýyna orai birlesken málimdege qol qoiyldy.
