Jyl basynan bergi taýar eksportynyń kólemi ótken kezeńdegi kórsetkishpen salystyrǵanda 30%-ǵa artty. Bul týraly QR Ulttyq bankiniń baspasóz qyzmeti habarlady.
«2017 jylǵy birinshi toqsanda taýar eksporty ótken kezeńdegi kórsetkishpen salystyrǵanda 30%-ǵa artyp, 11 mlrd AQSh dollaryn qurady. Bul, óz kezeginde, Qazaqstan tólem balansynyń aǵymdaǵy shotyndaǵy tapshylyqty azaitty. Osy kezeń aralyǵynda aǵymdaǵy shot tapshylyǵy aldyńǵy toqsanmen salystyrǵanda 2,6 ese qysqaryp, 1,1 mlrd AQSh dollaryn qurady», - delingen habarlamada.
Sarapshylardyń aitýynsha, buǵan eń aldymen álemdik taýar naryqtaryndaǵy baǵanyń salystyrmaly túrde ósýi jáne «Qashaǵan» ken ornyndaǵy óndiristiń iske qosylýy yqpal etken.
«Munai jáne gaz kondensaty eksportynyń quny 2016 jylǵy 1-toqsanmen salystyrǵanda 35%-ǵa, qara jáne tústi metaldardiki 63%-ǵa jáne 24%-ǵa ósti. Nátijesinde saýda balansynyń oń saldosy ótken jylǵy kórsetkishpen salystyrǵanda 1,5 ese ósip, 4,1 mlrd AQSh dollaryna deiin ulǵaidy», - delingen baspasóz habarlamasynda.
