2019 jyldyń 1 qyrkúiegine deiin Qazaqstannyń bes oblysyndaǵy shalǵai aýyldarǵa internet qosylady. Bul týraly QR Tsifrlyq damý, qorǵanys jáne aeroǵarysh ónerkásibi ministrliginiń baspasóz qyzmetinen málim etti, dep habarlaidy "Ult aqparat".
Mundai mindettemeni talshyqty-optikalyq bailanys jelisin taratatyn operatorlar alyp otyr. Oǵan sáikes, úsh ai ishinde 201 aýylǵa joǵary jyldamdyqtaǵy internet qosylady. Birinshi kezekte 223 mektep, 191 aýrýhana, 117 ákimdik úshin ǵalamtor qoljetimdi bolmaq. Bul nysandar Jambyl, Qaraǵandy, Qyzylorda, Pavlodar jáne Túrkistan oblystarynyń aýyldarynda ornalasqan.
Jalpy, 2019 jyly «Qazaqstan Respýblikasynyń aýyldyq eldi mekenderin talshyqty-optikalyq bailanys jelileri tehnologiiasy boiynsha keń jolaqty qoljetimdilikpen qamtamasyz etý» jobasyn iske asyrý sheńberinde 685 aýyldy eldi mekende ornalasqan 2 myńnan astam memlekettik organ men biýdjettik uiymdy internetke qosý josparlanǵan.
Atalǵan jumys «Tsifrlyq Qazaqstan» memlekettik baǵdarlamasy men aýyldardy sapaly internetpen qamtamasyz etý boiynsha mindetterdi oryndaý sheńberinde júrgiziledi. Eldi mekenderdiń tizimi aýdan ortalyqtary men qalalardan alshaqtyǵy, halyqtyń sany 500 turǵynnan kem bolmaýy, memlekettik, bilim berý jáne meditsinalyq uiymdardyń bolýy sekildi talaptarǵa sai jasalǵan bolatyn.
«Qazirgi zamanǵy telekommýnikatsiialyq infraqurylymdy qurý baǵytyndaǵy jumys halyqqa zamanaýi bailanys qyzmetterine qoljetimdiligin qamtamasyz etýge múmkindik beredi. Osylaisha, Qazaqstanda internetti paidalanýshylardyń úlesi 2018 jyly 81,3 paiyzǵa jetti. Bul baǵyttaǵy jumys jalǵasatyn bolady», - dep atap ótti QR Tsifrlyq damý, qorǵanys jáne aeroǵarysh ónerkásibi ministrligi Telekommýnikatsiia komitetiniń tóraǵasy Vitalii Iaroshenko.
