Qazaqstannyń selikon alqabyn jasaý qajet. Bul týraly búgin «Digital Bridge» halyqaralyq innovatsiialyq forýmy aiasynda BAQ ókilderine suhbat bergen Astana hab qyzmetkeri Djozef Tsigler aitty, dep habarlaidy QazAqparat tilshisi.
«Biz bul jerde eko júieni damytyp, talanatty jastarmen jumys isteitin bolamyz. Astana Hub-ta jumys isteýge usynys jasaǵany úshin qýanyshtymyn. Bul jerde kóptegen talanatty adam jinalatyn bolady. Olar bul júieni birlese otyryp, damytady. Barlyǵy da amerikalyq selikon alqabyn kóshirýge tyrysady. Bul - durys ádis emes. Qazaqstannyń ózindik selikon alqabyn qurý qajet. Óitkeni, amerikalyq selikon alqaby erterekte qurylǵan jáne onyń da óz kemshilikteri bar», - dedi ol.
Onyń atap ótýinshe, Astana Hub startap jobalardy qalai qurý kerektigin, investitsiia qalai salý kerektigin úiretetin bolady.
«Injener retinde tehnologiialarǵa senimim mol jáne taiaý ýaqytta Qazaqstanda óziniń tehnologiiasyn quratyn bolady. Jalpy, ózim de ómirde tabysty júzege asyrylǵan kóptegen startap jasaǵan edim», - dedi Djozef Tsigler.
Aita keteiik, forýmynyń ashylýynda QR Aqparat jáne kommýnikatsiialar ministri Dáýren Abaev Qazaqstan Aziia men Eýropa tehnologiialyq ortalyqtarynyń arasynda altyn kópirge ainalatyndyǵyn aitty.
Digital Bridge - Qazaqstandaǵy biylǵy jyly ótip otyrǵan basty innovatsiialyq oqiǵa.
Qatysýshylar forýmnyń dialogtik alańynda tsifrlandyrý salasyndaǵy sońǵy álemdik trendterdi talqylap, aldyńǵy qatarly tájiribelermen jáne biznes-modeldermen bólisedi. Forýmǵa halyqaralyq IT-qoǵamdastyǵynyń negizgi ókilderi, tehnologiia salasyndaǵy tanylǵan sarapshylar, kásiporyn basshylary, tehnologiialyq kásipkerler, sondai-aq birqatar eldiń memlekettik sektorlarynyń ókilderi, ǵalymdar, tsifrlyq ázirlemeler salasynyń mamandary, venchýrlyq investorlar qatysýda.
Forým aiasynda «Tsifrlyq ekonomika damýynyń jahandyq trendi jóninde dialogy» atty plenarlyq sessiiasy ótedi. Sonymen qatar sessiia jumysyna QR Premer-Ministri Baqytjan Saǵyntaev, Resei Federatsiiasynyń tsifrlyq damý, bailanys jáne buqaralyq kommýnikatsiialar ministri Konstantin Noskov qatysady dep kútilýde.
