Elimizdegi orman qorynyń kólemi men qordy odan ári jetildirý sharalarynyń qalai júzege asyrylatyndyǵy týraly QR Ekologiia, geologiia jáne tabiǵi resýrstar vitse-ministri Erlan Nysanbaev aityp berdi, dep habarlaidy "Ult aqparat".
«Búginde barlyq oblystar boiynsha qansha orman qory bary belgili. Iaǵni, ár oblys boiynsha orman alqabynyń kólemi bar. Mysaly, Aqmola oblysynda - 55 ga orman alqaby, Aqtóbede - 64 myń ga, ShQO-da - 374 myń ga, BQO-da - 65,9 myń ga, Qostanaida - 52 myń ga, Qaraǵandyda - 26 myń ga, Pavlodarda - 87 myń ga jáne Jambyl oblysynda 1 mln ga jýyq orman alqaby bar. Qazirgi ýaqytta ár oblys ákimdigimen osy aǵash egý protsesine qatysty jeke-jeke esep-qisap júrgizip jatyrmyz. Ózderińiz biletindei, Memleket basshysynyń tapsyrmasyna sáikes biz 2025 jylǵa deiin el kóleminde 2 mlrd túp tal egýimiz kerek», - dedi E. Nysanbaev.
Ministr orynbasarynyń sózine sensek, elimizde aǵash otyrǵyzý, kútý jáne ony jetildirýmen ainalysatyn arnaiy ǵylymi ortalyqtar bar.
«Atalǵan ǵylymi mekemelerdiń ózindik zertteý aýmaqtary bar. Onda aǵashtyń birneshe túri otyrǵyzylyp, ony elimizdiń qai óńirinde ósirýge bolatyny anyqtalady. Bizde egiletin aǵashtar - 2 jyldyq kóshet. Ol kóshettiń uzyndyǵy - 7-10 sm. Sondai-aq, ǵylymi tájiribe boiynsha biz aǵashtardy jii araqashyqtyqta egetin bolamyz. Onyń sebebi - ár aǵashtyń óziniń tabiǵi ósý protsesi bar. Sonymen qatar, aǵash ekologiialyq jaǵdaidy jaqsartý maqsatynan bólek, turmysta qoldanýǵa, iaǵni qýraǵan nemese synyp, solyp qalǵan aǵashtardy paidaǵa jaratýǵa da qajet. Jáne qurylys salasynda qoldanylatyn aǵashtar bar», - deidi ol.
