Qazaqstannyń on toǵyz millionynshy azamaty 20 maýsymda Almaty qalasynda týdy. Bul týraly ulttyq statistika biýrosy habarlady.
Halyqtyń aǵymdaǵy esebi derekterine sáikes 2021 jyldyń 20 maýsymynda Qazaqstan Respýblikasynyń 19 millionynshy turǵyny dúniege keldi.
"Elimizdiń on toǵyz millionynshy turǵyny retinde Janiia Azamatqyzy anyqtaldy. Ol Almaty qalasynda týǵan, otbasynda tórtinshi bala", - delingen habarlamada.
Týý týraly aktisine sáikes, náresteniń ata-anasy Almaty oblysy Ile aýdany Chapaevo aýylynda turady. Anasy – 1986 jylǵy Nazgúl Kóbentaeva, ákesi – 1982 jylǵy Azamat Nurǵaliev.
Bul rette Ulttyq statistika biýrosy on toǵyz millionynshy turǵyn qalai anyqtalǵanyn túsindirdi. Ony anyqtaý kezinde tabiǵi qozǵalys ósimi (belgili bir kezeńde dúniege kelgender men qaitys bolǵandar arasyndaǵy aiyrma) jáne halyqtyń kóshi-qon aiyrymy (el aýmaǵyna belgili bir kezeńde kelgender sany jáne onyń sheginen tys ketkender sany arasyndaǵy aiyrma) eskerilgen. Kandidatýra jalpy respýblika boiynsha, turatyn jerine táýelsiz anyqtaldy.
Táýelsizdik jyldary ishinde Qazaqstan halqynyń sany 2 557,9 myń adamǵa (15,5%) ósip, biyl 1 shildede 19 009,6 myń adamdy qurady.
3 tamyz kúni Prezident Qasym-Jomart Toqaev Twitter-de Qazaqstan halqy 19 million adamǵa jetkenin habarlady. Memleket basshysy on toǵyz millionynshy azamattyń ata-anasy men qazaqstandyqtardy osy qýanyshpen quttyqtady.
