Otandyq media naryqqa ólshem jasalyp jatyr. Iaǵni, media tutynýshylardy kóbinese qandai kontentter qyzyqtyrady jáne ony qaidan taýyp qaraityny anyqtalmaq.
Bul týraly QR Aqparat jáne qoǵamdyq damý vitse-ministri Kemelbek Oishybaev málim etti, dep habarlaidy QazAqparat.
«Biz úshin halyqty qandai media kontent qyzyqtyratyny jáne ony qaidan qaraityny mańyzdy. Osy oraida biz mediaólsheý júrgizýdi qolǵa aldyq. Maqsat – media tutynýshylardy ne qyzyqtyrantynyn anyqtaý. Onyń ishinde qala men aýyl jurtyn qandai resýrstar qyzyqtyratyny da eskireledi. Árine bul jańashyldyq emes. Media naryqta ólshem túsinigi buǵan deiin de bar. Bizdiń mindet mediaólshemdi ashyq túrde júrgizip, qoljetimdi etý. Jáne oǵan qatysýshylardyń sanyn arttyrý. Iaǵni halyq qandai media kontentti qaraitynyn túsiný. Aita ketetin jait, bul bastama elimizdiń media, jarnama naryǵyn baqylaýdy nemese tekserýdi kózdemeidi», - dedi K. Oishybaev.
Vitse-ministrdiń aitýynsha, mediaólshem tek televidenie salasynda emes, sonymen qatar internet qaýymdastyq men áleýmettik jeliler boiynsha da júrgiziledi.
«Saittarda kóbinese qandai taqyryptar oqylady nemese jelide ne týraly videolar jii qaralady oǵanda ólshem jasalady. Iaǵni elimizdiń búkil media naryǵyna ólshem júrgiziledi. Qazirgi ýaqytta ólshem televidenie salasy boiynsha júrip jatyr. Onyń barysy men nátijesi ministrliktiń resmi saityna jariialanady. Al internet media naryǵyna ólshem júrgizý kelesi jyly qolǵa alynady. Onyń qorytyndysy da onlain túrde qoljetimdi bolady», - deidi ol.
Aita keteiik, ministr orynbasary «Astana Media Week – 2021» media aptalyǵy aiasyndaǵy «Mediany damytý strategiiasy» atty dóńgelek ústel barysynda baiandama jasady.
