Foto: QR TJM baspasóz qyzmeti
Túrkiiaǵa joiqyn jer silkinisinen zardap shekkenderdi qutqarýǵa barǵan sheteldik qutqarýshylardyń arasynda Qazaqstannyń qutqarýshylary eń sońǵy bolyp elge qaitqan. Bul týraly Tótenshe jaǵdailar birinshi vitse-ministri Ibragim Kúlshimbaev aitty, dep habarlaidy Sputnik Qazaqstan.
Ortalyq kommýnikatsiialar qyzmetinde ótken baspasóz máslihatynda jýrnalister Túrkiiada izdeý-qutqarý jumystaryn aiaqtap, elge oralý týraly sheshim qalai qabyldanǵanyn surady.
Kúlshimbaev qazaqstandyq qutqarýshylar Túrkiiada on kún jumys istegenin atap ótti. 17 aqpanda izdeý-qutqarý jumystary toqtatylǵan.
"Gaziantepte ornalasqan daǵdarys ortalyǵynda Túrkiia ishki ister ministriniń orynbasary, oblys ákimi, bizdiń Qazaqstan elshisi bar, solardyń sheshimi boiynsha qabyldandy. Aita keteiin, biz, Qazaqstan qutqarýshylary Túrkiiadan eń sońǵy bolyp shyqtyq. Bizdiń aldymyzda jetinshi-segizinshi kúnderi basqa shet elderdiń qutqarýshylary ketip jatty. Biraq biz eń sońǵy bop izdeý jumystaryn aiaqtap, sodan keiin qaittyq", - dedi vitse-ministr.
Aitýynsha, qazir Túrkiianyń zilzaladan zardap shekken aimaqtarynda izdeý-qutqarý jumystary aiaqtaldy. Jergilikti ákimshilikter uiymdastyrǵan qurylys jumystary ǵana júrip jatyr.
Sondai-aq ol qazaqstandyq qutqarýshylar jumys istegen aimaqta maroderler kezdespegenin aitty.
"Bizdiń istep jatqan jerde bir ǵana oqiǵa boldy. Bir jigit "men osy jerdiń turǵynymyn, úiim bar" dep aramyzǵa qosylǵan, biraq Túrkiianyń politsiia qyzmetkerleri álgi jigitti alyp shyǵyp, tekserip edi, ol izdeýde júrgen azamat eken. Ony tártip saqshylary ustap alyp ketti", - dedi vitse-ministr.
Eske salsaq, 6 aqpan kúni Túrkiiada magnitýdasy 7,8 joiqyn jer silkinisi boldy. Jerasty dúmpýlerinen eldiń 10 provintsiiasy zardap shekti.
Prezidenttiń tapsyrmasymen zilzala saldaryn joiýǵa kómek kórsetý úshin Qazaqstannan 100-ge jýyq qutqarýshy Túrkiiaǵa attandy. Onyń ishinde Tótenshe jaǵdailar ministrliginiń 6 birlik tehnikasy, ministrliktiń jedel tobynyń 3 ókili, Apattar meditsinasy ortalyǵynyń 10 dárigeri, Respýblikalyq jedel-qutqarý jasaǵynyń qutqarýshylary men 6 kinologiialyq eseptoptary bar.
7 jáne 9 aqpan kúni TJM jiyntyq toby eki eshalonmen jolǵa shyǵyp, eń kúrdeli qiraǵan obektilerde izdestirý-qutqarý jumystaryn júrgizdi.
Qazaqstandyq qutqarýshylar Túrkiiada barlyǵy 7 adamdy qutqaryp, qaza bolǵan 88 adamnyń denesin úiindi astynan alyp shyqty.
Olar 18-19 kúnderi eki reispen elge oraldy.
