Qazaqstannyń eki azamaty Grýziiada úsh ai quldyqta bolǵanyn aitty. Grýziia politsiiasy olardyń qujattaryn qaitarmai otyrǵan kórinedi. Qazaqstan syrtqy ister ministrligi biýdjetten aqsha bólingen soń eki azamat elge qaitarylatynyn habarlady, dep jazady Azattyq.
Quldyqta boldym degenderdiń biri – almatylyq 18 jastaǵy Damý Jailaýbektiń aitýynsha, ol joldasy Aqjol Aǵybaimen birge tamyz aiynda tanystary arqyly jumys izdep Dýbaiǵa barǵan. Sodan soń shaqyrǵan tarap tólqujattaryn alyp, ózderin Kievke, keiin Grýziiaǵa aparǵan.
Jailaýbektiń aitýynsha, olardy eriksiz qamap ustaǵan – Qytai azamattary.
– Dýbaida saiahatpen bailanysty jumys isteisińder degen. Keiin "jumys basqa jaqta bolatyn boldy, sendermen basqa kompaniia ainalysady" dep, Batýmiden bir-aq shyqtyq. Áldebir qytailardyń qol astynda boldyq. Kompiýtermen adam aldaýmen ainalysasyń dep uryp-soǵyp, májbúrlep, 24 saǵat jumys istetti, – deidi Damý Jailaýbek.
Jailaýbektiń aitýynsha, "jumys berýshiler" olardy syrtqy álemmen bailanystyrmai, durys tamaq bermei, qamap ustap, jalǵan qor birjasynyń brokerleri siiaqty jumys istetken. Keiin olar ebin taýyp, Grýziiadaǵy Qazaqstan elshiligine habarlasqan.
Damý Jailaýbektiń cózinshe, "quldyqpen ainalysty" degen adamdardy Grýziia politsiiasy ustap, tergeýdi bastaǵan soń Qazaqstannyń eki azamaty bostandyqqa shyqqan, biraq qujattaryn politsiia alyp qoiǵan.
Jailaýbektiń sózinshe, Grýziia tártip saqshylary olardy adam saýdasymen ainalysatyn qylmystyq topqa qatysy bar adamdar retinde tergeitinin aitqan.
Ázirge kimderdiń ústinen qylmystyq is qozǵalǵany, Jailaýbek pen Aǵybaidyń ol istegi statýsy týraly resmi málimet joq.
Qazir Damý Jailaýbek pen Aqjol Aǵybai Batýmidegi qonaq úide jatyr.
Qytai qazaǵy, kásipker Qanat Qojanyń aitýynsha, qazaq jigitterin quldyqqa jekti degender – adam saýdasymen jáne kóleńkeli birjalyq biznespen ainalysatyn úlken top.
– Qolymda tolyq shemasy bar. Olar qor birjasynyń balamasyn jasap, basqalarǵa "myna kompaniianyń aktsiiasyn alyńyzdar, sonda sizderdiń tabystaryńyz eki ese bolady" dep jalǵan aqparat taratýmen, Facebook arqyly birjada oinaityndardy izdep taýyp, solardy aldaýmen ainalysady. Olardyń tabys ainalymy – 1-3 million dollar. Bul topta 30 adam bar, – deidi ol.
Qanat Qoja quldyqqa tústim degen qazaq jigitterine kezdeisoq tap bolyp, olarǵa kómektesip jatqanyn aitady.
Qazaqstan syrtqy ister ministrligi eki azamatynyń Grýziiada qiyn jaǵdaiǵa tap bolǵanyn rastady. Ministrliktiń baspasóz hatshysy Aibek Smadiiarovtyń aitýynsha, Batýmidegi qurmetti konsýldyqqa Qazaqstan azamattarynan habarlama biylǵy 10 qarashada túsken.
– Osy jyldyń 10 qarashasynda [Batýmidegi qurmetti] konsýldyqqa belgisiz uialy telefonnan qazaq azamaty habarlasyp, qujatsyz otyrǵandaryn, ózderin Qytai azamattarynyń kúshtep ustap otyrǵanyn aitqan. Qazaqstannyń [Grýziiadaǵy] elshiligi birden politsiiaǵa habarlasyp, olardy bosatyp aldy. Grýziiada osy máselege bailanysty qylmystyq is qozǵaldy. Bizdiń azamattar qaýipsiz jerge kóshirildi, - dedi ol.
Smadiiarovtyń aitýynsha, eki azamat osy aptada Qazaqstanǵa jetkizilýi kerek.
– Bizdiń eldiń azamattary basqa elde júrip, adam saýdasy kesirinen [qiyndyqqa tap bolyp] nemese basqa jaǵdaiǵa ushyrap, qujatynan aiyrylyp qalsa, memlekettik biýdjetten olardy elge jetkizýge arnaiy qarjy bólinedi. Osy qarajat konsýldyq esep-shotyna túsken soń, ol adamdar elge qaitarylady. Bul osy aptanyń ortasynda nemese sońynda bolýy múmkin, – dedi ol Azattyqqa.
