Qazaqstannyń 4 qalasynda ǵana káriz sýyn tazalaý qurylǵysy durys jumys istep tur. Bul jaiynda Sybailas jemqorlyqqa qarsy qyzmet uiymdastyrǵan onlain suhbat barysynda QR Indýstriia jáne infraqurylymdyq damý ministrligindegi «Adaldyq alańy» jobalyq keńsesiniń jetekshisi Bolat Qasymov aitty, dep habarlaidy QazAqparat.
«Bizde eldi mekenderdiń basym bóligi káriz sýyn tazalaý qurylǵysymen qamtamasyz etilmegen. Qostanai, Taraz, Semei, Arqalyq, Jezqazǵan qalalarynda káriz sýyn tazalaý júiesi bolǵanymen, jumys istemeidi. Tek 4 qalada, atap aitqanda Nur-Sultan, Almaty, Taldyqorǵan jáne Shymkent qalasynda ǵana durys jumys jasap tur. Qalǵandarynda jańǵyrtýdy, kúrdeli jóndeýden ótkizýdi jáne kei jerlerde jańa tazartý qurylǵysyn salýdy qajet etedi», - dedi ol.
Onyń atap ótýinshe, qazirgi ýaqytta memleket bul máselege basa nazar aýdaryp otyr. Máselen, ótken jyldyń 12 sáýirinde ótken Qaýipsizdik keńesiniń otyrysynda Elbasy Nursultan Nazarbaev kázir sýyn tazalaý qurylǵysyn salý jáne jańǵyrtýǵa barynsha qoldaý kórsetýdi tapsyrǵan.
«Qazirgi ýaqytta 53 qalanyń jáne eldiń mekenniń tizimi jasaqtaldy. Bul sharýamen ainalysyp jatqan «Turǵyn úi kommýnaldyq-sharýashylyǵyn jańǵyrtý men damytýdyń qazaqstandyq ortalyǵy» bar. Biz olarmen tyǵyz jumys istep jatyrmyz. Ortalyq arnaiy baǵdarlama jasaýda jáne oǵan biz memlekettik organdarmen birge kómektesýdemiz. Qazaqstannyń ekologiialyq uiymdary qaýymdastyǵynyń bastamasymen atalǵan ortalyqpen birlesip, ǵylymi bilim berý konsortsiýmyn qurdyq. Nazarbaev Ýniversiteti alańynda naryq qatysýshylaryn oqytý da josparlǵan», - dedi Bolat Qasymov.
