Elimizde 2020 jyldyń qańtar-shildesinde áýe kompaniialary 2,6 mln adamdy tasymaldady. Bul bir jyl burynǵy kórsetkishke qaraǵanda 43,1%-ǵa az, dep habarlaidy "Ult aqparat" energyprom.kz saityna silteme jasap.
Al shilde aiynda jolaýshylar tasymaly 304,9 myń adamdy qurady – maýsym aiymen salystyrǵanda 36,6%-ǵa kemigen jáne ótken jyldan 3,3 ese az.
QR IIDM azamattyq aviatsiia komitetiniń málimetine sensek, jolaýshylar ainalymy 4,3 mlrd jkm qurady – bir jyl burynǵyǵa qaraǵanda 2,2 ese az. Shilde aiynda bul kórsetkish 467,8 mln jkm boldy – maýsym aiymen salystyrǵanda 1,8%-ǵa az jáne ótken jyldyń shilde aiymen salystyrǵanda 4,2 ese tómendegen.
Vedomstvoaralyq komissiianyń 2020 jylǵy 11 tamyzdaǵy sheshimi boiynsha 17 tamyzdan bastap Qazaqstan aptasyna 23 reis jiiligimen 6 baǵyt boiynsha, 4 elge halyqaralyq ushýdy kezeń-kezeńimen qaita bastaldy. Olar: BAÁ (11 reis), Germaniia (5 reis), Belarýs (4 reis), Ýkraina (3 reis).
Jeti aidyń qorytyndysy boiynsha júk pen jol júgin tasymaldaý 10,9 myń tonnany qurady. Bul bir jyl burynǵyǵa qaraǵanda 23,6%-ǵa az. Shilde aiynda tasymaldaý ótken jylmen salystyrǵanda 33,3%-ǵa, iaǵni 1,4 myń tonnaǵa deiin tómendedi.
Osy merzim ishinde júk ainalymy 30,6 mln tkm qurady – bir jyl burynǵyǵa qaraǵanda 36,7%-ǵa az. Shilde aiynda júk ainalymy 24,3%-ǵa, iaǵni 3,7 mln tkm-ge deiin tómendedi.
Shilde aiynda ótken jyldyń shildesimen salystyrǵanda jolaýshylarǵa arnalǵan áýe kompaniialarynyń qyzmet baǵasy 19%-ǵa tómendegen.
Sektordaǵy qyzmetterdiń barynsha arzandaýy Shymkentte (51,3%-ǵa), elordada (46,4%-ǵa) jáne Aqtóbe oblysynda (37,2%-ǵa) baiqaldy. Tórt óńirde baǵa ózgerissiz qaldy: Aqmola, Almaty, Soltústik Qazaqstan jáne Túrkistan oblystarynda. Taǵy eki óńirde qyzmetter qymbattady: Atyraý oblysynda birden 18,5%-ǵa, al Qostanai oblysynda – 4,3%-ǵa.
