Qazaqstanda tabysy az otbasylarynyń balalary úshin kepildik berilgen áleýmettik toptama (KBÁT) berý jalǵasýda. Respýblikanyń 11 óńiriniń 85 aýdanynda alýshylarǵa azyq-túlik jiyntyǵy berildi, dep habarlaidy "Ult aqparat".
«Olardyń qatarynda Aqmola, Aqtóbe, Atyraý, Qaraǵandy, Qostanai, Qyzylorda, Mańǵystaý, Shyǵys Qazaqstan, Batys Qazaqstan oblystary, Almaty jáne Pavlodar qalalary bar. Alýshylardyń jalpy sany 9,6 myń otbasyndaǵy 17,6 myń balany qurady. Jalpy, ataýly áleýmettik kómek (AÁK) alatyn tabysy az otbasylardaǵy 1 jastan 6 jasqa deiingi 64 myń balany qamtý josparlanýda», - delingen Eńbek jáne halyqty áleýmettik qorǵaý ministrligi málimetinde.
Esterińizge sala keteiik, Memleket basshysy Qazaqstan halqyna Joldaýynda AÁK taǵaiyndaý tetigin onyń ashyqtyǵyn, ádildigin jáne eńbekke degen yntasyn qamtamasyz etý maqsatynda túzetýge tapsyrma bergen bolatyn. Memlekettik kómektiń jańa sharalary 2020 jylǵy 1 qańtardan bastap keshendi túrde júzege asyrylýda. Oǵan kópbalaly otbasylarǵa arnalǵan jańa memlekettik járdemaqy, ataýly áleýmettik kómek, tabysy az otbasylardaǵy balalarǵa arnalǵan kepildik berilgen áleýmettik toptama kiredi.
1 jastan 6 jasqa deiingi balalarǵa arnalǵan KBÁT azyq-túlik jiyntyǵyn jáne turmystyq himiia taýarlarynyń jiyntyǵyn qamtidy. 6 jastan 18 jasqa deiingi balalar úshin mektepterde ystyq tamaq, oqý quraldary men mektep kiimderin berý kózdeledi. Sondai-aq, osy sanattaǵy balalar úshin mektepke deiingi jol júrý shyǵyndaryn óteitin bolady.
Azyq-túlik jiyntyǵy balalardyń jas sanatyna bailanysty óz quramy boiynsha erekshelenedi: 1 jastan 3 jasqa deiin jáne 3 jastan 6 jasqa deiin, biraq áleýmettik toptamanyń quramy óńirge qaramastan birdei. Jiyn quramy fiziologiialyq erekshelikterdi, azyq-túliktiń taǵamdyq jáne energetikalyq qundylyǵynyń araqatynasyn jáne jasyna sáikes olardy paidalaný normalaryn eskere otyryp, Densaýlyq saqtaý ministrliginiń usynymdary negizinde qurylǵan. Ónimder dárýmenge bai, bul ósip kele jatqan aǵzadaǵy dárýmenderdiń jetispeýshiligin óteýge múmkindik beredi.
1-den 3 jasqa deiingi balalarǵa arnalǵan jiyntyq sút, pechene, botqa, úlpek jáne balalar piýresin qamtidy. 3 jastan 6 jasqa deiingilerge arnalǵan azyq-túlik jiyntyǵy sútten, makaronnan, suly úlpekterinen, kúnbaǵys maiynan, gematogennen, tańǵy asqa arnalǵan sút jastyqtarynan, balalar pechenesinen, arpa, qaraqumyq jarmasynan, burshaq pen baldan turady.
1 jastan 6 jasqa deiingi balalarǵa arnalǵan turmystyq himiia taýarlarynyń jiyntyǵyna tis pastasy, shetka, krem-sabyn, sabyn, sýsabyn, untaq jáne krem kiredi. Tabysy az otbasynyń árbir balasyna osy jiyntyq toqsan saiyn beriletin bolady.
