Qazaqstannan shyǵarylǵan Tájikstan azamaty atyn ózgertip, qaityp kelgen, – dep habarlaidy Polisia.kz.
Atyraý oblysy Politsiia departamenti 6-12 jeltoqsan aralyǵynda “Migrant” jedel-profilaktikalyq is-sharasyn ótkizý kezinde Qazaqstan Respýblikasy aýmaǵynan qoǵamdyq orynda mas kúide júrgeni úshin 5 jylǵa shettetilgen sheteldikti anyqtady.
Tájikstan Respýblikasynyń 35 jastaǵy azamaty óz eline baryp, jeke basyn rastaityn qujattaryndaǵy aqparatty ózgertip, Qazaqstanǵa qaityp kelgendigi belgili boldy.
– Atalǵan fakti jedel-profilaktikalyq is-shara ótkizý kezinde taksi júrgizýshi bolyp jumys istep júrgen Tájikstan azamatynyń qujattaryn tekserý barysynda anyqtaldy. Ustalǵan sheteldik óz kinásin tolyqtai moiyndady. Qazirgi tańda el shekarasyna zańsyz kirgen er adam 30 táýlikke ákimshilik qamaýǵa alyndy. Is-qujattar jinaqtalyp, zańdy sheshimin shyǵarý úshin sotqa joldanatyn bolady, – dedi Atyraý qalalyq Politsiia basqarmasy Kóshi-qon qyzmeti bóliminiń bastyǵy Qadyrbek Ábishov.
