Parlament Májilisiniń jalpy otyrysynda QR Ishki ister ministri Erlan Turǵymbaev zańsyz kóshi-qonmen kúres jumystaryn baiandady, dep habarlaidy QazAqparat.
«Qazaqstan tranzittik el bolyp sanalady, kóktemde emigranttar Qazaqstan arqyly Resei baǵytynda saparlaidy, al kúzde keri qaitady. Osy oraida elimizdiń barlyq quqyq qorǵaý organdaryna eleýli júkteme túsedi», - dedi ministr.
Onyń aitýynsha, kóktemde jáne kúzde «Migrant» jedel aldyn alý is-sharalary uiymdastyrylady. Sonymen qatar kórshiles elderdiń quqyq qorǵaý organdaryna tiisti operatsiia júrgiziletindigi týraly eskertiledi. Bul turǵyda azamattardy deportatsiialaý iske asyrylady. Máselen, koronavirýs infektsiiasy kezinde migranttardyń kóbisi Qazaqstan aýmaǵynan shyǵa almady. Osy oraida Úkimettiń arnaiy qaýlysy qabyldanyp, elde bolý merzimi uzartyldy. Sonymen qatar qańtar-aqpan ailarynda bizdiń aýmaqta qalǵan barlyq azamattarǵa qatysty tiisti jumystar atqaryldy. Qańtar-aqpanda 133 myń migrant óz elderine qaitaryldy.
«Qazaqstannan óz erkimen ketýge bas tartqandar jáne ishki ister organdarynan jasyrynyp júrgenderge toqtalsaq, 674 adamdy sot tártibimen deportatsiialadyq. Bul turǵyda olarǵa qatysty bes jyl merzimde Qazaqstan aýmaǵyna kelýge shekteý qarastyrylǵan. 3,5 myń shetel azamaty ákimshilik jaýapkershilikke tartyldy. Sonymen qatar elimiz arqyly zańsyz tranzit arnasy uiymdastyrylǵany úshin 27 qylmystyq is qozǵaldy», - dedi E. Turǵymbaev.
Budan buryn habarlanǵandai, Parlament Májilisiniń jalpy otyrysynda «Qazaqstan Respýblikasynyń Úkimeti men Qyrǵyz Respýblikasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratifikatsiialaý týraly» zań jobasy maquldandy.
