Foto: QR SIM
Erteń, 30 mamyrda Koreia Respýblikasynyń Syrtqy ister ministri Pak Djin Qazaqstanǵa resmi saparmen keledi. Bul týraly búgingi brifingte Syrtqy ister ministrliginiń resmi ókili Aibek Smadiiarov málimdedi, dep habarlaidy Sputnik Qazaqstan saity.
Úsh kúndik sapar barysynda Chin Premer-ministrdiń orynbasary – Syrtqy ister ministri Murat Nurtileýmen kezdesedi.
"Taraptar keńeitilgen strategiialyq áriptestiktiń, sonyń ishinde saiasi-ekonomikalyq jáne mádeni ózara is-qimyl salalaryndaǵy Qazaqstan men Ońtústik Koreia qarym-qatynasynyń qazirgi jai-kúii men perspektivalaryn talqylaidy. Koreia ministriniń memleket basshylyǵymen kezdesýi josparlanǵan", - dedi Smadiiarov.
Osy oraida jýrnalister Koreiaǵa jumysqa baratyn qazaqstandyqtar úshin kvota engizý máselesin surady. Buǵan deiin jyl saiyn 50 myń kvota alý týraly aitylǵan. Smadiiarovtyń aitýynsha, bul máselemen eńbek jáne halyqty áleýmettik qorǵaý ministrligi ainalysyp jatyr. Ázirshe, eshqandai ózgeris joq. Degenmen Koreia ministriniń sapary kezinde bul másele talqylanýy múmkin.
"Bul másele áli sheshilmegen. Erteń talqylanýy múmkin. Óitkeni Koreia ministri Qazaqstanda úsh kún bolady, kóp másele talqylanady. Ázirshe ózgeris joq, qazaqstandyqtar vizasyz rejimmen kire alady. Al zańdy túrde jumys istegisi kelse, onda sol jaqta koreialyq kompaniiamen kelisimshartqa otyryp, osy jerden tiisti vizasyn rásimdei alady", - dep atap ótti Smadiiarov.
Aita keteri, Koreiaǵa jumysqa baratyn qazaqstandyqtardy kvotamen kirgizý boiynsha kelissózder bastaldy. Qazaqstan Koreiadan 50 myń kvota alýdy josparlap otyr.
