Búgin Astanaǵa alǵash ret halyqaralyq paralimpiada komitetiniń prezidenti Endriý Parsons resmi saparmen keldi, dep habarlaidy QazAqparat tilshisi.
Halyqaralyq komitet basshysy aldymen Astanadaǵy zamanaýi paralimpiadalyq jattyǵý ortalyǵynyń jumysymen tanysty. Odan soń, qurmetti qonaq pen QR Ulttyq paralimpiada komitetiniń prezidenti Qairat Boranbaevtyń qatysýymen baspasóz máslihaty ótti.
Sondai-aq, atalǵan kezdesýge otandyq belgili Zúlfiia Ǵabidýllina, Aleksandr Koliadin sekildi parasportshylar qatysty.
«Meniń Qazaqstanǵa alǵash ret kelýim, osy rette alǵan áserim - ol bólek áńgime. Al búgingi taqyryp parasportqa arnalǵandyqtan onyń sizderde bar ekenine kózim jetti. Qazaqstandaǵy parasport damýynyń nátijesi, halyqaralyq paralimpiadadaǵy jetistikterden bilýge bolady. Sondai-aq halyqaralyq standartqa sai paralimpiadalyq ortalyqtaryńyz bar. Biz óz tarapymyzdan Qazaqstannyń paralimpiadalyq ulttyq komitetimen birlesip jumys isteýge ázirmiz. Sonyń bir dáleli osy jazda Astanada para-paýerliftingten ótetin álem chempionaty», - dedi Endriý Parsons.
Óz kezeginde elimizdiń Ulttyq paralimpiada komitetiniń prezidenti Qairat Boranbaev qurmetti qonaqqa alǵysyn bildire otyryp, kezdesýdiń Qazaqstanda parasporttyń odan ári damýyna úles qosatynyn aityp ótti.
«Parsons myrzanyń kelýdegi negizgi maqsaty - bizdegi parasporttyń damýy deńgeii jáne ol úshin jasalǵan múmkindiktermen tanysý. Eki kúndik sapar aiasynda parasport taqyrybyna arnalǵan birqatar mańyzdy kezdesýler josparlanýda. Jalpy atalǵan halyqaralyq komitetpen biz tyǵyz bailanystamyz. Onyń dáleli - sońǵy 3 jylda ulttyq komitet halyqaralyq komitettiń paralimpiadaǵa arnalǵan birneshe jobalyq grantyn utyp, ony óz elimizde júzege asyryp kelemiz», - dedi ol.
Erteń halyqaralyq paralimpiada komitetiniń prezidenti Endriý Parsonstyń Úkimet basshysy Baqytjan Saǵyntaevpen kezdesýi josparlanýda. Onda komitet basshysy Qazaqstannyń sońǵy jyldardaǵy halyqaralyq arenada qol jetkizgen jetistikteri men elimizde paralimpiadany odan ári ilgeriletý máselesi sóz bolady dep kútilýde.
Aita ketsek, halyqaralyq paralimpiada komiteti álemdik deńgeidegi barlyq parasporttyq sharalardy ótkizý men basqarýǵa jaýapty. Atalǵan uiymnyń quramyna álemniń 180 ulttyq paralimpiadalyq komiteti kiredi, onyń ishinde bizdiń ulttyq paralimpiadalyq komitette bar.
