Ishki ister ministrliginiń Kóshi-qon politsiiasy basqarmasynyń bastyǵy Ǵani Shymyrbaev Qazaqstanǵa osy jyldyń basynan beri 11 myńǵa jýyq etnikalyq qazaqtyń kelgenin málim etti, dep habarlaidy QazAqparat.
«Elimizde etnikalyq qazaqtardy qonystandyrý tetigin jetildirýge baǵyttalǵan QR kóshi-qon jáne halyqty jumyspen qamtý máseleleri boiynsha zańnamalyq aktilerge ózgerister men tolyqtyrýlar engizý týraly zańǵa qol qoiylǵan bolatyn. Ásirese, osy sanattaǵy azamattar úshin oralman mártebesin berý jáne tólem júktemesinen bosatý, burynǵy azamattyqtan shyǵýdy resimdemeý jeńildikteri berildi. Onyń ishinde JOO-larda oqityn etnikalyq qazaqtar QR-da turý merzimine qaramastan azamattyqty jeńildetilgen tártippen alý quqyǵyna ie boldy. Bul Qytaidan Qazaqstanǵa turaqty turýǵa keletin etnikalyq qazaqtardyń máselesin sheshýge múmkindik berdi», - dedi Ǵani Shymyrbaev elordada «Sheteldegi otandastardy memlekettik qoldaý týraly» QR zań jobasyn talqylaý barysynda.
Onyń aitýynsha, joǵaryda atalǵan jumystardyń nátijesinde shettegi qandastardyń kóp bóligi kóship, Qazaqstan azamattyǵyn alǵan.
«Statistikaǵa súiensek, elimiz táýelsizdik alǵan sátten bastap, Qazaqstan Respýblikasynyń azamattyǵyn 1 mln 57 myń 537 sheteldik alǵan. Onyń ishinde 937 myń 663-i – etnikalyq qazaqtar. Al osy jyldyń esep berý kezeńine toqtalar bolsaq, azamattyqqa barlyǵy 13 034 sheteldik qabyldandy. Onyń 10 790-ny – etnikalyq qazaqtar. Olardyń basym bóligi Qytaidan kelgen qandastar (4092). Ózbekstannan - 6216, Qyrǵyzstannan 551 adam keldi», - dedi Ǵani Shymyrbaev.
