Qazaqstanda 60 jastan asqan azamattar revaktsinalaýda Pfizer vaktsinasyn saldyra alady. Bul týraly Densaýlyq saqtaý ministri Ajar Ǵiniiat málimdedi, - dep habarlaidy Tengrinews.kz tilshisi.
"Halyqtyń eń osal tobyn qorǵaý úshin revaktsinalaýǵa arnalǵan vaktsinalar qatary keńeitildi. Osylaisha, 60 jastan asqan adamdarǵa revaktsinalaý úshin qosymsha Komirnati (Pfizer) vaktsinasy usynylady. Epidemiologiialyq jaǵdai kúrt nasharlaǵanyn eskere otyryp, vedomstvoaralyq komissiianyń kezekti otyrysyna ujymdardy bólýge jáne qyzyl aimaqta ornalasqan óńirlerde infektsiianyń taralý qaýpin azaitýǵa baǵyttalǵan qosymsha sharalary qabyldanady", - dedi ol Úkimet otyrysynda.
Onyń aitýynsha, omikron shtamy anyqtalǵanyn eskere otyryp, qosymsha aldyn alý sharalary engizilip, iske asyrylyp jatyr. Sonymen qatar, vedomstvo basshysy búginde "halyqty vaktsinalaý jáne revaktsinalaý baǵytyndaǵy jumys qarqynyn arttyrý mańyzdy" ekenin aitty.
"Respýblikada keiingi aptada vaktsinalaý qarqyny birneshe ese tómendedi jáne qańtardyń 10 kúninde vaktsina saldyrǵandardyń úles salmaǵy jeltoqsanmen salystyrǵanda 0,2 paiyzǵa ǵana artty. Búginde 1-komponentin 9,4 millionnan asa adam aldy, bul - eresekterdiń 79,2 paiyzy, 2-komponentin 8,7 millionnan asa adam aldy, bul - eresekterdiń - 75,1 paiyzy. Jalpy 1-komponentin - 49,3 paiyz, 2-komponentin 45,8 paiyz adam aldy", - dedi Ajar Ǵiniiat.
