Foto: ashyq derekkóz
Qazaqstanda memlekettik grant iegerleriniń esimi belgili boldy. Mamandyq pen joǵary oqý ornyn tańdaý – túlekter men olardyń ata-analary úshin ómirdegi eń jaýapty kezeńderdiń biri. Bul sheshim tek bolashaq mansap jolyn ǵana emes, sonymen qatar jeke baqyt pen qarjylyq turaqtylyqty da aiqyndaidy.
Qoǵamdyq saiasat institýtynyń júrgizgen saýalnamasy qazaqstandyqtardyń bul tańdaýda qandai faktorlarǵa mán beretinin kórsetti. Sońǵy jyldary negizgi basymdyq ata-ananyń pikirinen jeke niet pen sanaly tańdaýǵa aýysyp keledi. Saýalnamaǵa qatysqandardyń 55,8%-y mamandyq tańdaýda balanyń óz sheshimin eskerý mańyzdy dep sanaidy.
Qyzyǵy, bul kózqaras aýyl turǵyndary arasynda qala turǵyndaryna qaraǵanda jii kezdesedi. Sondai-aq er adamdar bul pikirdi áielderge qaraǵanda kóbirek qoldaidy.
Respondentterdiń 48,2%-y mamandyqty bolashaqta joǵary tabys tabý múmkindigine qarap tańdaidy. Al 36,5%-y – oqý bitirgennen keiin mamandyq boiynsha jumysqa turý múmkindigin basty faktor dep sanaidy.
Tańdaýǵa áser etetin ózge de mańyzdy sebepterdiń qatarynda memlekettik grant esebinen tegin oqý múmkindigi (29,6%) jáne mamandyq pen joǵary oqý ornynyń bedeli (26,4%) bar.
Zertteý 2025 jyldyń 18 maýsymy men 4 shildesi aralyǵynda júrgizildi. Saýalnamaǵa 18 jastan asqan 2000 qazaqstandyq qatysty. Ulttyq reprezentativti irikteme negizinde júrgizilgen zertteýdiń qatelik mólsheri ±2,2%-dan aspaidy.
