Elimizde qazan aiynda 2800-den astam altyn quima satyldy, dep habarlaidy QazAqparat Ulttyq banktiń saityna silteme jasap.
Qazan aiynda ekinshi deńgeili bankter men banktik emes aiyrbastaý pýnkterinen jalpy salmaǵy 88,6 kg ólshengen 2 814 quima satyldy.
Tazartylǵan altyn quimany satý jáne satyp alý baǵdarlamasyn Ulttyq bank 2017 jyly iske qosqan. Sodan beri jalpy salmaǵy 2,5 tonna 68 230 altyn quima satyldy.
«Altyn quimalardyń bes túri satylady: 5, 10, 20, 50 jáne 100 g salmaqtaǵy quimalar. Al satyp alýshylar arasynda eń kóp suranysqa ie quima – 10 gramdyq. Onyń jalpy satylym kólemindegi úlesi 28% nemese 19 090 dana. Odan keiin suranysqa ie túrleri – salmaǵy 100 gramm – 15 204 dana (22%) jáne 20 gramdyq – 13 282 dana (20%), 5 gramdyq – 11 651 dana (17%), 50 gramdyq – 9 003 (13%) quima. Kóbinese, altyn quimalar Almaty, Nur-Sultan jáne Atyraý qalalarynyń turǵyndary arasynda suranysqa ie», delingen habarlamada.
Ulttyq banktiń málimdeýinshe, jalpy, altyn quimalar – investitsiianyń senimdi quraly. Altyn quima naryǵyndaǵy joǵary satylymdy qamtamasyz etetin basty faktordyń biri – ekinshi deńgeili bankter men banktik emes uiymdar tutynýshyǵa aqshany tapsyrǵan kúni tólep, altyn quimany keri satyp ala alady.
Baǵdarlama iske qosylǵannan beri ekinshi deńgeili bankter men aiyrbastaý pýnkteri jalpy salmaǵy 247 kg ólshengen 10 126 quimany keri satyp aldy. Bul jalpy quimalardyń 15%-y. Qabyldanǵan quimalardyń barlyǵy Ulttyq banktiń aýmaqtyń filialdaryna qaitarylmastan halyqqa satylady.
«Árbir altyn quimada ony qorǵap turatyn elementteri bar (quimalardyń beti qaptalyp, mikroteksi jazylady jáne releft jiegi salynady) jáne arnaiy qorapqa salynady, qorap quimany zaqymdaýdan qorǵaidy, ári qorap ashylǵan-ashylmaǵanyn ońai tekserýge bolady. Qorap, sondai-aq, sapa sertifikatyna da jaýap beredi. Sondyqtan, quimany durys saqtap, qorabyn búldirmegen jón», - delingen habarlamada.
Ulttyq banktiń málimetinshe, qazir altyn quimalardy Halyk Bank, Eýraziialyq bank, Jusan Bank, BankTsentrKredit jáne banktik emes aiyrbastaý pýnkterinen satyp alýǵa bolady.
