BZJQ qazaqstandyqtardyń arnaiy shottaryna eki trillion teńgeden asa qarjy aýdardy. Degenmen zeinetaqy qoryndaǵy jinaq somasy bes paiyzǵa artqan, - dep habarlaidy Tengrinews.kz tilshisi.
2021 jylǵy 1 qazanda elimizdiń Biryńǵai jinaqtaýshy zeinetaqy qoryndaǵy azamattardyń zeinetaqy jinaqtary 13,1 trillion teńgege jetti, bul byltyrǵy sáikes kezeńimen salystyrǵanda bes paiyzǵa artyq.
Salymshylar jinaǵynyń bir bóligin turǵyn úi jaǵdaiyn jaqsartýǵa jáne emdelýge, sondai-aq jinaqtaryn jeke basqarýshy kompaniialarǵa (JTB) aýdarýǵa bolatynyna qaramastan, bul kórsetkish ósti. Osylaisha, júie turaqtylyqty kórsetti.
Jinaq kóleminiń ósýi zeinetaqy jarnalary men investitsiialyq kirister kóleminiń ulǵaiýymen bailanysty. Máselen, 2021 jylǵy 1 qazandaǵy jaǵdai boiynsha salymshylardyń shotyna tólemderdi qaitarýdy qosa alǵanda, onyń ishinde turǵyn úi jaǵdaiyn jaqsartýǵa jáne emdelýge aqy tóleýge jalpy somasy 1,2 trillion teńge zeinetaqy jarnalary túsken. Kiris aǵyndary 2020 jyldyń sáikes kezeńimen salystyrǵanda 439,5 milliard teńgege nemese 57 paiyzǵa ósti. Salymshylar jarnasynan basqa, zeinetaqy jinaqtarynyń aitarlyqtai artýy 2021 jylǵy 1 qańtar men 1 qazan aralyǵynda 1 trillion teńgeden asqan, ol taza investitsiialyq kiris esebinen.
2021 jylǵy 5 qarashadaǵy jaǵdai boiynsha Biryńǵai jinaqtaýshy zeinetaqy qory salymshylardyń (alýshylardyń) ómir súrý jaǵdaiyn jaqsartý maqsatynda jinaqtalǵan zeinetaqy qarajatyn paidalanýǵa 491,1 myń ótinishin oryndady. BZJQ qazaqstandyqtardyń ýákiletti operatorlar – bankterde ashylǵan arnaiy shottaryna eki trillion teńgege jýyq qarajat aýdarǵan. Birjolǵy zeinetaqy tólemderiniń ortasha mólsheri tórt million teńge boldy. Oryndalǵan ótinishterdiń basym bóligin Almaty (17 paiyz), Mańǵystaý oblysy (13,5 paiyz) jáne Nur-Sultan (13 paiyz) turǵyndary joldaǵan.
Sondai-aq, BZJQ jalpy somasy shamamen 55,7 milliard teńgege emdelýge 61,4 myńǵa jýyq ótinishti oryndady. Bul rette qarajatty alýdyń ortasha somasy bir million teńgege jetpeidi.
Sondai-aq, qazaqstandyqtardyń birjolǵy zeinetaqy tólemderin ótinish berýshiniń ótinishi boiynsha jáne ózge de sebeptermen belgilengen merzimde paidalanbaýyna bailanysty BZJQ-ǵa 280 milliard teńgeden asa qarajat qaitarylǵan.
BZJQ-ǵa qarajatty qaitarý, investitsiialyq kiristi jáne memleket kepildikterin joǵaltý, sondai-aq JAT-ny merziminen buryn esepteý jaǵdailaryn boldyrmaý úshin salymshylar (alýshylar) birjolǵy zeinetaqy tólemderin paidalanýdy jaýapkershilikpen jáne muqiiat josparlaýy qajet. Olar jinaqtyń bir bóligin alǵannan keiin, eńbek qyzmeti aiaqtalǵanda zeinetaqy tólemderiniń mólsheri az bolatynyn túsinýi kerek.
Biyl qańtar-qyrkúiekte BZJQ-dan túsken zeinetaqy tólemderi 2,1 trillion teńge boldy. Bul rette, negizgi soma nemese 90,7 paiyzy turǵyn úi jaǵdaiyn jaqsartýǵa jáne emdelýge aqy tóleýge tólenetin birjolǵy zeinetaqy tólemderi.
Qalǵan 3,4 paiyzy nemese 73,2 milliard teńgesi keste boiynsha tólemder;
- 1,4 paiyzy nemese 29,1 milliard teńge – turaqty turýǵa ketýge bailanysty tólemder;
- 2,2 paiyzy nemese 47,2 milliard teńge – muragerlerge, jerleýge tólenetin tólemder;
- 2,2 paiyzy nemese 47,6 milliard teńge – saqtandyrý uiymdaryna aýdarymdar.
