Elimizde bedeýligi bar juptardyń basym kópshiligi donor retinde týystarynyń jynystyq jasýshasyn paidalanýdy qalaidy. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy "Ult aqparat".
«1995 jyldan bastap Qazaqstanda 85 000-ǵa jýyq erli-zaiypty qosalqy reprodýktivtik tehnologiialar ádisterimen emdeldi. Qazirgi ýaqytta elde 27 ekstrakorporaldyq uryqtandyrý (budan ári - EKU) ortalyǵy jumys isteidi. Osy EKU baǵdarlamasyn oryndaityn meditsina ortalyqtarynda jeke donorlar bazasy bar. Bir meditsina ortalyǵyndaǵy donorlar bazasyna tirkelgen jynystyq jasýsha donory, ekinshi meditsina ortalyǵynyń bazasyna tirkelýge quqyǵy joq. Qazirgi tańda ortalyqtandyrylǵan donorlar bazasyn qurý týraly másele arnaiy mamandardyń arasynda talqylanyp, osy baǵytta qajetti is-sharalar júrgizý qolǵa alynýda», - delingen Úkimet basshysynyń orynbasarynyń jaýabynda.
Onyń jaýabynda, «Jynystyq jasýshalardyń, reprodýktivtik aǵzalar tinderiniń donorlyǵyn júrgizý qaǵidalary men sharttaryn bekitý týraly» Densaýlyq saqtaý ministri buiryǵynyń 1-taraýynda bir donordan 10 jynystyq jasýsha alynǵannan keiin azamat donorlar bazasynan shyǵarylatyndyǵy aitylǵan.
«25 jyldyń ishinde EKU baǵdarlamasymen 24 000 náreste, sondai-aq 100 jynystyq jasýsha donorynan 120 náreste dúniege kelgen. Ol EKU-men dúniege kelgen jalpy bala sanynyń 0,5 paiyzyn quraidy. Sonymen qatar, elimizde bedeýligi bar juptardyń basym kópshiligi donorlyq EKU baǵdarlamasyn júrgizý úshin donor retinde týystarynyń jynystyq jasýshasyn paidalanýdy qalaidy», - degen Eraly Toǵjanov suraqqa jaýap berip.
