Ekinshi dúniejúzilik soǵys kezinde Reseidiń Smolensk oblysynda qaza tapqan jaýynger Medet Amanjolovtyń súiegin týystaryna berý rásimi astanadaǵy aviatsiia bazasynda ótti, dep habarlaidy "Ult aqparat" QR qorǵanys ministrliginiń baspasóz qyzmetine silteme jasap.
«Qaza tapqan maidangerdiń súiegi sáýir aiynyń basynda Smolensk oblysynyń Temkin aýdanynda izdeý-barlaý ekspeditsiiasyn ótkizý kezinde tabyldy. Saqtalyp qalǵan moiyntumarynyń arqasynda jaýyngerdiń esimi anyqtaldy. 9 mamyrda áskeri bortpen sarbazdyń súiegi Nur-Sultan qalasyndaǵy aviatsiia bazasyna jetkizildi», delingen habarlamada.
Qazaqstan Qarýly kúshteri áskeri basshylyǵynyń, Qazaqstandaǵy Resei elshiligi qyzmetkerleriniń jáne aviabazanyń jeke quramynyń qatysýymen áskeri rásimderdi saqtai otyryp, súiekti týǵan jerine jerleý úshin týystaryna tapsyrdy.
«Búgin biz maidannan oralmaǵan sarbazdarǵa taǵzym etip, jerlesimiz Medet Amanjolovtyń súiegin eline 78 jyldan keiin týǵan-týystaryna tabystaýǵa jinaldyq. Sol ýaqytta Qazaqstanda 12 atqyshtar, 4 kavaleriialyq diviziia, 7 brigada, 50 polk qurylǵan bolatyn. Sarbazdarynyń erligin urpaǵymyz umytpaýy tiis», - dedi QR QK Áýe qorúanys kúshteri bas qolbasshysynyń orynbasary polkovnik Álim Ybyraev.
Medet Amanjolov Qaraǵandy oblysy Shet aýdany Jasterek aýylynyń týmasy. Soǵys aldynda ol áskerge shaqyrylyp,1941jyly 24jasynda maidanǵa birden attandy. Onyń sońǵy qyzmet orny 125-shi jeke atqyshtar brigadasynyń jeke barlaý rotasy edi.
Sarbazdyń týystary áli de sol Shet aýylynda turyp jatyr.1942 jyly onyń otbasyna Smolensk qalasyn qorǵaý kezinde Medet Amanjolovtyń qaza bolǵany týraly habar alady. Kóp jyldar boiy urpaqtary onyń jerlengen jerin taba almaǵan, biraq 78 jyldan keiin jaýyngerdi týǵan jerine jerleýge múmkindik týdy.
«Bizge qońyraý shalyp, atamyzdyń súieginiń tabylǵanyn habarlady. Biz tańqalǵanymyz sonsha, tipti eshteńe aita almadyq. Sodan keiin bizge elshilik pen áskeriler kómek kórsetti. Qazir ony týǵan jerine aparamyz», - dep oiymen bólisti tabylǵan sarbazdyń nemeresi Murat Amanjolov.
