Meditsina ǵylymdarynyń doktory, professor, QR DSM Dárilik zattar men meditsinalyq maqsattaǵy buiymdardy saraptaý ulttyq ortalyǵynyń sarapshysy Aleksandr Gýliaev koronavirýsqa qarsy qazaqstandyq vaktsina men reseilik «Spýtnik V» ekpesiniń aiyrmashylyǵy týraly túsinik berdi, dep habarlaidy QazAqparat.
«QazCovid-In vaktsinasyn zertteý jyl boiy júrgizildi. Klinikalyq zertteýler qyrkúiek aiynda bastaldy. Bastapqyda 44 erikti osyǵan qatysqan bolatyn. Klinikalyq zertteýdiń birinshi fazasy vaktsinanyń qaýipsizdigin zertteýge qatysty edi. Nátijesinde, 180 kún boiy júrgizilgen baiqaý kezinde eshqandai kúrdeli teris áserler tirkelmedi. Vaktsina qaýipsiz dep tanyldy», - dedi A. Gýliaev Ortalyq kommýniýkatsiialar qyzmetinde.
Sonymen qatar ol ekinshi kezeńde vaktsinanyń klinikalyq tiimdiligi zerttelgenin, oǵan 200 erikti qatysqanyn eske saldy.
«180 kún boiy vaktsinalaý jasalǵannan keiin, qalyptasatyn antideneler deńgeii tekserilip turdy. Vaktsina joǵary tiimdilikti kórsetip, ekpe jasalǵan árbir jaǵdaida antideneler qalyptasyp otyrdy. Úshinshi kezeń 2020 jyldyń 25 jeltoqsanynda bastaldy. Bul rette zertteýmen 3 000 adam qamtyldy jáne ol 180 kúnge sozylady. Úshinshi fazanyń ótýine qatysty aralyq esep jaqyn arada bolady», - dedi ǵalym.
Sraptama júrgizý erejesine sáikes, 31 jeltoqsanda QazCovid-In vaktsinasy ýaqytsha tirkeý kýáligin aldy. Bul óz kezeginde vaktsinany zertteýdi keńeitip, onyń óndirisin jedeldetedi.
«Qaz Covid-in - inaktivtelgen ekpe. Bul turǵyda ol reseilik vaktsinadan ózgeshe. Reseilik ekpe antideneler qalyptasýyn bastaýshy aqýyzdy quraidy. Osy vaktsinalardy tikelei salystyrý qisynsyz. Tikelei salystyrý barlyq úsh fazanyń zertteý málimetteri alynǵanda múmkin bolady. Sol kezde bul vaktsinalardyń basymdyǵy nemese kemshiligi týraly túsinik beriledi», - dedi sarapshy.
Osy oraida ol úsh fazanyń tolyq klinikalyq zertteýi álemde júrgizilmegenin aitty.
«Jalpy ahýal retteýshi organdarǵa ýaqytsha tirkeýlerdi berýge jáne vaktsinalaý júrgizýdi bastaýǵa itermelep otyr. Bul óz kezeginde qandai da bir qaýipsizdik erejeleri eskerilmei jatyr degendi bildirmeidi. Japoniia, AQSh, Eýropada jáne Qazaqstanda vaktsinalardyń qaýipsizdigi men tiimdiligin baǵalaý qadamdarynda eshqandai aiyrmashylyq joq. Osy baǵyttaǵy jumystar aitarlyqtai uzaq protsess», - dedi ǵalym.
Aleksandr Gýliaevtiń aitýynsha, qazirgi ýaqytta QR DSM Dárilik zattar men meditsinalyq maqsattaǵy buiymdardy saraptaý ulttyq ortalyǵyna vaktsinalardan jaǵymsyz kúrdeli áseri týraly aqparat kelip túspegen.
