QR Densaýlyq saqtaý vitse-ministri – bas memlekettik sanitar dáriger Erlan Qiiasov koronavirýsqa qarsy qazaqstandyq vaktsinany ózine synaýǵa daiyn ekenin málimdedi, dep habarlaidy QazAqparat.
Aita keteiik, OKQ-da ótken baspasóz máslihatynda Azattyq radiosynyń tilshisi Densaýlyq saqtaý ministrliginiń ókilderinen «qazaqstandyq vaktsinany halyqtan buryn ózderińizge salyp, synaýǵa daiynsyzdar ma?» degen suraq qoiǵan bolatyn.
Bul suraqqa jaýap bergen QR Densaýlyq saqtaý ministrligi meditsinalyq jáne farmatsevtikalyq baqylaý komiteti tóraǵasynyń orynbasary mindetin atqarýshy Nurlybek Asylbekov synaq jumystary eń aldymen eriktilerge júrgiziletinin eske saldy.
«Vaktsinany ázirleýshiler men synaqtan ótýshiler bastapqy kezeńnen beri birge kele jatyr. Eger aýqymdy synaq bolsa, daiynbyz», - dedi Nurlybek Asylbekov.
Bul suraq baspasóz máslihaty barysynda Erlan Qiiasovqa da qoiylǵan bolatyn.
«Men bul suraqqa «daiynmyn» dep jaýap beremin. Halyqtan buryn ózime synaýǵa daiynmyn», - dedi vitse-ministr.
