Shymkenttik kompaniia toqyma ónimderin Túrkiia, Qytai, Ońtústik Koreia, Italiia, Resei elderine eksportqa shyǵarýdy kózdep otyr, dep habarlaidy QazAqparat.
«Biyl qalaǵa investitsiia tartý maqsatynda Singapýr, Túrkiia, Qytai, BAÁ, Resei jáne Koreia, Ózbekstan elderdiń áleýetti investorlarymen kezdesýler ótkizdik. Nátijesinde ózbek investorlarynyń qatysýymen 5-shi jeltoqsanda qalamyzda birneshe jyldan beri toqtap turǵan «Alians» JShS (burynǵy «Iýteks» AQ) jip iirý fabrikasy iske qosyldy. Bul óndiris osy jyldyń sońyna deiin 60 tonna, al kelesi jyly 6 myń tonna maqta-talshyǵy ónimderin shyǵarýǵa múmkindik beredi», - dedi Shymkent qalasynyń ákimi Erlan Aitahanov OKQ-da ótken baspasóz máslihatynda.
Qala basshysynyń aitýyna qaraǵanda, aldaǵy ýaqytta shaharda burynǵy «Melanj» kompaniiasy qaita iske qosylady. Osynyń nátijesinde joǵary sapaly toqyma ónimderi Túrkiia, Qytai, Ońtústik Koreia, Italiia, Resei elderine eksportqa shyǵarylmaq. Bul óz kezeginde elimizde óńdeletin maqta kólemin 2 esege arttyryp, 800 adamǵa jumys ornyn bermek.
«Kelesi jyly aýmaǵy 306 gektar jerge 3-shi jańa «Juldyz» indýstriialyq aimaǵyn qurý jumystary júrgiziledi. Qazirgi tańda tehnikalyq-ekonomikalyq negizdeme ázirlenýde. Investorlar tarapynan qyzyǵýshylyq joǵary. Búginniń ózinde 20 mlrd teńgege 1 myńǵa jýyq jańa jumys ornymen 20 joba júzege asyrýǵa investorlar niet bildirdi», - dedi ol.
