Otandyq taýar óndirýshiler úshin birja saýdasynda akkreditteý júiesi jeńildei túspek, dep habarlaidy QazAqparat Saýda jáne integratsiia ministrligi usynǵan resmi málimetke súiene otyryp.
Memleket basshysynyń tapsyrmasyna sáikes QR Saýda jáne integratsiia ministrligi qoldanystaǵy «Keibir zańnamalyq aktilerge saýda qyzmeti, birjalyq saýdany damytý jáne derbes derekterdi qorǵaý týraly zań jobasyna ózgerister men tolyqtyrýlar engizdi.
«Prezident júktep otyrǵan tapsyrmaǵa sai birja saýdasynyń biryńǵai qaǵidasyn iske asyrýdyń jańa tásilderi qolǵa alynady. Birinshiden, brokerler men dilerlerdiń taýar birjasyna qol jetkizýine biryńǵai talap engiziledi. Olarǵa eki jáne odan da kóp birjany akkreditteýge múmkindik beriledi. Ekinshiden, satýshylar men satyp alýshylardyń saýda sharttary men rásimderin ózgertpei basqa birjaǵa erkin ótý múmkindigi engizilmek. Úshinshiden, otandyq taýar óndirýshiler úshin birja saýdasyndaǵy akkreditteý júiesi jeńildei túspek. Ol úshin birjalyq alymnyń tómendetilgen stavkasy belgilenedi. Jáne tórtinshiden birjalyq mámilelerdiń jaýapkershiligi men qaýipsizdigi deńgeiin arttyrý qarastyrylyp otyr. Iaǵni birja qatysýshylarynyń táýekelin tómendetý úshin eń tómengi qarjylyq turaqtylyqtyń shegin belgileý kózdelgen», - dep habarlandy atalǵan vedomstvodan.
Sondai-aq, zańdaǵy ózgerister men tolyqtyrýlar aiasynda otandyq birja saýdasyn ne kútip turǵany týraly aityldy.
«Birjalyq saýdanyń turaqty naryǵyn qalyptastyrýǵa, qoljetimdilik pen adal básekelestikti arttyrýǵa jaǵdai jasaidy. Satýshylar men satyp alýshylar tarapynan brokerler men birjaǵa qatysty yqtimal áser men qysym joiylady. Sonymen qatar zańdaǵy ózgeris jańa birja taýaryn jetkizýshiler men satyp alýshylardy, sonyń ishinde sheteldik satyp alýshylardy yntalandyra túspek. Jáne otandyq birja saýdasy kóleminiń 5,6 trln teńgege deiin artatyny kútilýde. Odan bólek, tabiǵi baǵany belgileýge jáne birjalyq kelisimderdiń ashyqtyǵyn qamtamasyz etýge múmkindik beredi», - delingen habarlamada.
