Qazaqstandyq sýretshi Sáýle Dúisenbinanyń «Objective ornament II» atty týyndysyn Los-Andjelestiń LACMA atty óner mýzeii arnaiy satyp aldy, dep habarlaidy "Ult aqparat".
«Bul kartina HVIII ǵasyrda ómir súrgen ispan sýretshisi Fransisko Goiianyń týyndysyna uqsas. Sýret 2018 salyndy, onda paralleldi álem men qazaqtyń ulttyq bas kiimi arqyly bizdiń qazirgi ómirimiz beinelengen. Men ózim Amerikada galleriiada jumys isteimin. Aǵymdaǵy jyldyń kókteminde Niý-Iorkte ortaaziialyq birneshe sýretshiniń toptyq kórmesi ótti. Onyń ishinde Qazaqstannan meniń týyndylarym, sonymen qatar Ózbekstan men Qyrǵyzstan sýretshileriniń eńbegi boldy. Kórmeni salanyń kásibi mamandarymen qatar ónerge qyzyǵýshylar tamashalady, meniń jumysym kórmeden soń satyldy. Ózim kásibi sýretshimin jáne bul salada biraz jyldar eńbektenip kelemin. Negizgi taqyrybym keskindeme, grafika jáne annimatsiia. Jumysym barysynda barlyq zamanaýi tehnika men tehnologiialar múmkindigin qoldanamyn», - deidi S. Dúisenbina.
Avtordyń aitýynsha, Los-Andjelestiń óner mýzeii satyp alǵan kartina buǵan deiin Qazaqstanda kórmege qoiylǵan.
«Uly dalanyń tarihy» atty kóshpeli kórmeniń aiasynda bul týyndy Shymkent, Taraz jáne Taldyqorǵan qalalarynda kópshiliktiń nazaryna usynyldy. Taldyqorǵanda ótken kórme kezinde jumysqa qarsy bolyp, ony kórmeden alyp tastaýdy suraǵandar boldy. Onyń sebebi qazaqtyń ulttyq bas kiimin kigen qyzdyń aiaǵynyń ashyq bolýy. Iaǵni, qazaqtyń bas kiimin qorlady degen jeleý. Sodan soń maǵan týyndymnyń kózdegen maǵynasyn túsindirýime týra keldi. Nátijesinde kartina kórmeniń sońyna deiin turdy», - deidi ol.
