Qazaqstandyq sýretshi áigili Louis Vuitton sán úiinde qyzmet etýge shaqyrtý aldy. Aneilia Ibraimova Ulybritaniia, Ońtústik-Afrika men Irlandiiadaǵy tanymal saýda jelileri men sánqoilarǵa arnap qol sandyqtaryn bezendiredi, dep habarlaidy QazAqparat.
24 jastaǵy jas talant Aneilia - Qaraǵandynyń týmasy, sońǵy on jyldan beri Londonda turady. Sýret ónerin osy jaqta meńgergen. Eki jyl buryn áigili Louis Vuitton sán úiine qarapaiym satýshy bolyp jumysqa turǵan ol, keiin dizainer retinde baiqaýda baq synap kóredi.
«Eki aiǵa sozylǵan qatal irikteýden óttim. Ulybritaniia jáne Eýropa elderiniń sýretshileri arasynan tańdap alynǵan 17 dizainerdiń biri bolǵanyma sheksiz rizamyn. Ártúrli ideialardy dúniege ákelemiz. Klientterdiń nazaryn aýdarý úshin jáne Louis Vuitton saýdasyn júrgizý úshin kreativti usynystar daiyndaimyz», - deidi jas sýretshi.
Qylqalamnyń has sheberi qazir Louis Vuitton-nyń áigili qolsandyqtaryn bezendiredi. Jalpy sán úiiniń sheberhanasyna kirýge ruqsat joq - óndiristik qupiia. Biraq Aneilia bizben jeke qoryndaǵy fotolarmen bólisti.
Ainelianyń árbir sýreti qaitalanbas dúnie. Sondyqtan olardy satyp alýǵa tanymal tulaǵalar da, ónerge qushtar jandar da asyq. Myna bir qolsandyqta Viktoriia patshaiymnyń táji beinelengen. Qylqalam sheberi ony túpnusqaǵa uqsatyp, dálme-dál jetkizýge tyrysqan.
Aneilianyń anasy Záýre Muhamadieva Londonda konsalting salasynda eńbek etedi. Bastapqyda qarjyger bolýyn qalaǵan ol qyzynyń shyǵarmashylyqqa jaqyn ekendigin baiqap, júregi qalaǵan mamandyqqa beripti.
«Qyzymnyń osyndai dárejege jetkenine óte rizamyn. Negizinen, bul onyń jeke basynyń jetistigi. Ol - óte eńbekqor adam. Árdaiym maqsatyna jetýdi kózdeidi jáne jetedi. Ómirde bastysy jalqaýlanbaý kerek. Biik maqsattar qoiyp, umtyla bilý qajet. Shetelde básekelestik óte joǵary. Biraq adam eńbek etip, umtyla bilse, árdaiym maqsatyna jetedi. Barlyqtaryńyzǵa aitarym, jas daryndardy qoldai bileiik», - deidi Aneilianyń anasy, jeke kásipker Záýre Muhamadieva.
Aneilia jeke shyǵarmashylyǵyn da damytyp keledi. Ol kúzge qarai Londonda óz kórmesin ashýdy josparlap otyr. Jeke týyndylaryn qaiyrymdylyq aýktsionyna shyǵaryp, odan túsken qarajatty jergilikti ǵibadathanany jóndeý jumystaryna jumsamaq.
Sýretshi týǵan jerimen de bailanysyn úzbeýge tyrysady. Bolashaqta Qazaqstanda jeke kórmesin ashqysy bar. «Men árdaiym Qazaqstanmen bailanysta bolǵym keledi. Óitkeni Otanym meni qanattandyrady jáne patriottyq sezimim eshqaida ketpek emes», deidi Aneilia.
