Osy aptada Venadaǵy ataqty Barokko zalynda qazaqstandyq opera ánshisi Aigúl Shamshidenovanyń jeke kontserti ótti. Klassikalyq mýzykanyń astanasy sanalatyn qalada 27 jastaǵy sopranonyń ónerin tamashalaýǵa kelgen halyqqa zal lyq toldy.
Venadaǵy kontsertke álemniń túkpir-túkpirinen kelgen ónesúier qaýymmen birge kóptegen tanymal ártister, mýzykanttar men diplomattar qatysty. Qonaqtardyń arasynda operalyq ánshi Marchella Cherno, Vena balynyń direktory Elizabet Smagin-Melloni, Frantsiiadaǵy Qazaqstannyń burynǵy elshisi Berlin Irishev boldy.
«Ár kelgen qonaqqa úlken alǵysymdy bildirgim keledi. Qatty tolqyp turmyn, kontserttik baǵdarlamany joǵary deńgeide oryndap shyǵýǵa barynsha tyrystym. Venalyq Ratýsh zalynda, onyń ústine álemdegi eń tanymal Fazioli roialiniń súiemeledeýimen óner kórsetý men úshin úlken jaýapkershilik», - dep Aigúl óz áserimen bólisti.
Kontsert barysynda qazaq qyzy shveitsariialyq Elizabet Sisi Malermen qosylyp dýet qurdy. Elizabet - «Karnegi Holl», «Vienna Konzerthaus» syndy álemdik sahnalarda óner kórsetken tanymal opera ánshisi. Qos talanttyń jarasymdy dýeti búginde kásibi mamandardyń qyzyǵýshylyǵyn týdyrǵany anyq.
Kontsert baǵdarlamasynda Rossini, Bellini, Donitsetti, Verdi, Sharpante syndy kompozitorlardyń shyǵarmalary oryndaldy. Opera salasyndaǵy sarapshy mamandardyń aitýynsha, Aigúl sekildi bai repertýardy jinap, ony oryndaýǵa álemdegi sanaýly ánshilerdiń ǵana shamasy jetedi.
Venada ótken kontsertten keiin Aigúlge dál osy baǵdarlamamen Eýropa, Ońtústik jáne Soltústik Amerika boiynsha týrne jasaýǵa usynys tústi. Sonymen qatar ánshi osy jyldyń maýsym aiynda Venada ótetin Gala kontserttiń shymyldyǵyn ashpaq.
Al oǵan deiin, 21 sáýir kúni Aigúl Shamshidenova Nur-Sultanda ótetin Astana Opera La regata-da qazaqstandyq kontr-tenor Batyrjan Smakovpen birge óner kórsetedi.
Aigúl Shamshidenova Taldyqorǵan qalasynda dúniege kelgen. Jániia Áýbákirova atyndaǵy kolledjden mýzykalyq bilim alyp, keiin Vena konservatoriiasyn támamdaǵan. Búgingi tańda ol atalmysh konservatoriiada magistrlik bilim alýmen qatar, Mahler filarmoniiasynyń jetekshi solisi bolyp qyzmet atqarady.
