Qazaqstan Tótenshe jaǵdailar ministrliginiń (TJM) qutqarýshylary Túrkiiada úiindiler astynan úsh adamdy aman alyp shyqty, dep habarlaidy "Ult aqparat" vedomstvonyń baspasóz qyzmetine silteme jasap.
Ministrlik ókilderiniń málimetinshe, ekinshi eshelon Túrkiiaǵa kelgen sátten bastap Qazaqstan TJM qutqarýshylary táýlik boiy qutqarý jumystaryn júrgizip jatyr.
"Ekinshi eshelon úshin izdeý orny retinde Nýrdagy - Gaziantep qalasynan 69 shaqyrym jerdegi tolyǵymen qiraǵan ǵimarat bekitildi.
Bul nysanda qazaqstandyq qutqarýshylar adamdardyń ornalasqan jeri men jai-kúiin anyqtaý, úiindiler astynda zardap shekkendermen aýdio bailanys ornatý, qajetti kómektiń kólemi men sipatyn anyqtaý boiynsha jumystaryn júrgizgen.
"Qazaqstandyq qutqarýshylardyń úlken tereńdiktegi úiindilerdiń astynan zardap shekkenderdi evakýatsiialaý úshin jol ashý jumystaryn oryndap, jedel jáne saýatty is-qimyldyń, sondai-aq zardap shekkenderdi bloktan shyǵarý boiynsha ýaqtyly qabyldanǵan sharalardyń nátijesinde búgin túnde kólemi 18 myń tekshe metrden astam úiindiniń astynan úsh tiri adamdy - er adam men eki áieldi shyǵarýǵa múmkindik týdy. Adamdar dereý meditsinalyq qyzmetterge jetkizildi", - delingen ministrlik habarlamasynda.
