Foto: QR TJM
Qazaqstandyq qutqarýshylar Túrkiianyń birneshe qalasynda úiindilerdi qoparý jumystaryn jalǵastyryp jatyr. Osy ýaqytqa deiin 7 adam qutqaryldy, dep habarlaidy Sputnik Qazaqstan.
"Búgingi tańda qazaqstandyq qutqarýshylar aman qalǵan 7 adamdy meditsina qyzmetkerlerine tapsyrdy. Qaitys bolǵan 19 adamnyń, onyń ishinde bir balanyń denesi úiindi astynan shyǵaryldy", - delingen tótenshe jaǵdailar ministrligi taratqan resmi habarlamada.
Al TJM apattar meditsinasy ortalyǵynda zardap shekken adamdarǵa táýlik boiy alǵashqy meditsinalyq kómek kórsetilip jatyr.
"Gaziantep qalasynda pnevmokarkasty modýl negizinde meditsinalyq beket ornatyldy, ol jeke quramdy jylytý úshin de qoldanylady. Sol jerde zardap shekkenderge, qutqarýshylarǵa, sondai-aq zardap shekkenderdiń týystary men jaqyndaryna shuǵyl kómek kórsetiledi. Kúnine orta eseppen 35-ten astam adam meditsinalyq kómekke júginedi", - deidi mamandar.
Sondai-aq kún saiyn jeke quramnyń jylytý pýnktinde zardap shekkenderdiń týystary men jaqyndary, orta eseppen 40-50 adam jylynady.
Qutqarýshylardyń birinshi toby Gaziantep qalasynda táýlik boiy eki aýysymda úsh ýchaskede jumys istep jatyr. Qazirgi kezde olar qiraǵan toǵyz qabatty ǵimaratty qoparyp jatyr. Ol jerde úiindi astynan 4 adam qutqaryldy, 4 qaza tapqan áieldiń denesi shyǵaryldy.
Al qutqarýshylardyń ekinshi toby ishinara qiraǵan alty qabatty ǵimarattan qaitys bolǵan 6 adamnyń denesin alyp shyqty. Úshinshi top ta alty qabatty úide jumys istep jatyr. Qurylys nysany tolyǵymen qiraǵan. Úiindi arasynan qaza tapqan 4 adamnyń denesi shyǵaryldy.
Qazaqstan TJM qutqarýshylarynyń ekinshi eshelony Túrkiiaǵa kelgen sátten bastap izdeý-qutqarý jumystary táýlik boiy júrgizilýde.
Qazaqstandyq qutqarýshylardyń ekinshi eshelony birden Nýrdagy qalasyna barǵan. Ol Gaziantepten 69 shaqyrym shalǵai jerde ornalasqan. Olar kólemi 18 myń tekshe metrden astam úiindiniń astynan úsh tiri adamdy – er adam men eki áieldi shyǵaryp aldy. Qaitys bolǵan bir adamnyń denesi tabyldy.
Sondai-aq, Memleket basshysy Qasym-Jomart Toqaevtyń tapsyrmasy boiynsha Hatai eldi mekenine qutqarýshylar toby jáne kinologtar jiberildi. Ol jaqta 9-10 aqpan kúnderi tolyǵymen qiraǵan alty qabatty úide qaitys bolǵan úsh adamnyń denesi shyǵaryldy, onyń biri – Qazaqstan azamaty, ekeýi – Túrkiia azamaty.
