Qazaqstandyq alǵashqy qajylar Saýd Arabiiasyna kelip jetti, dep habarlaidy "Ult aqparat" QR SIM saityna silteme jasap.
«30 shildede Qazaqstan Respýblikasynyń Jidda qalasyndaǵy (Saýd Arabiiasy Koroldigi) Konsýldyǵynyń qyzmetkerleri Jidda halyqaralyq áýejaiynda «Shymkent-Jidda» jáne «Aqtaý-Jidda» baǵyttarymen ushyp kelgen 198 adamnan turatyn qazaqstandyq qajylardyń alǵashqy eki tobyn kútip aldy. Jalpy alǵanda, SAK Úkimeti bólgen kvota boiynsha biylǵy jyly 3,2 myń otandasymyz Koroldik territoriiasyndaǵy qasietti jerlerge ziiarat jasaý múmkindigine ie. Úlken qajylyq merzimi 9-13 tamyz aralyǵyna sáikes keledi», delingen habarlamada.
Biylǵy jyly, ádettegidei, qazaqstandyq qajylardy Koroldiktegi Jidda men Medina qalalaryna Nur-Sultannan, Almatydan, Shymkentten jáne Aqtaýdan otandyq jáne saýdtyq «SCAT» jáne «FlyNas» áýekompaniialary, sáikesinshe, birlesip tasymaldaidy.
Atap aitqanda, SAK aviatsiialyq bilik oryndarymen aldyn ala kelisilgen kestege sáikes, azamattarymyzdyń Saýd Arabiiasyna kelý merzimi 30 shildege, qaitý merzimi - 17 tamyzǵa belgilengen. Qazirgi ýaqytta qajylyq maýsymy kezinde arnaiy rejimde jumys isteitin konsýldyq elimizdiń Er-Riiad qalasyndaǵy elshiliginiń jalpy úilestirýimen qazaqstandyq qajylardy qabyldaý, olarǵa qajylyq rásimderin ótý kezderinde qolaily jaǵdai jasaý, Koroldikte bolý kezeńderinde qaýipsizdikterin qamtamasyz etý, sondai-aq olardy elge ýaqtyly jetkizý máselelerimen tikelei ainalysýda. Osy maqsatta Saýd Arabiiasynyń «Qajylyq-2019» maýsymyna jaýapty úkimettik jáne aviatsiialyq bilik oryndarymen tikelei bailanys ornatqan.
Jalpy, Jidda men Medina qalalarynda qajylardy kútip alý men shyǵaryp salý konsýldyq tarapynan diplomattardyń kezekshilik kestesi negizinde qatań túrde júzege asyrylady. Koroldiktiń joǵarǵy oqý oryndarynda bilim alýdaǵy qazaqstandyq stýdentter de bul jumysqa jii jumyldyrylyp otyrady. Konsýldyq tarapynan qajylar arasynda turǵylyqty eldiń zańdylyqtaryn saqtaý, túrli juqpaly aýrýlardyń (tumaý, meningit) aldyn alý úshin sanitarlyq-gigienalyq erejelerdiń saqtalýyna mán berý, jergilikti salt-dástúrlerge qurmetpen qaraý jáne t.b. máseleler boiynsha tiisti túsindirme jumystary júrgiziledi.
Mekke men Medina qalalarynyń ortalyq shtabtarynda qazaqstandyq «Qajylyq-missiiasy» uiymdastyrǵan statsionarlyq bólimsheler táýlik boiy jumys isteitin bolady. Olarda qazaqstandyq dárigerler tarapynan qajylarǵa alǵashqy meditsinalyq kómek beriledi.
Eske sala ketsek, biyl Saýd Arabiia biligi biylǵy qajylyqqa viza alý jolyn ońtailandyrdy.
Álemniń ár túkpirinen baratyn azamattar endi qajylyq vizasyn elektrondy júie arqyly alady.
Aita keterligi, Saýd Arabiiasy Koroldiginiń qajylyq isteri boiynsha ministrligi 2018 jyly Qazaqstanǵa qajylyq sapar úshin 3 myń kvota bólgen bolatyn.
