Otandyq ǵalymdar qurǵap qalǵan Aral teńiziniń ornyna fitomeliorativ tehnologiiasy arqyly aǵash otyrǵyzý kerek dep sanaidy. Bul týraly S. Seifýllin atyndaǵy Qazaq agrotehnikalyq ýniversiteti basqarma tóraǵasynyń halyqaralyq qatynastar jáne strategiialyq josparlaý boiynsha orynbasary Erlan Nysanbaev málim etti, dep habarlaidy QazAqparat.
«Búginde elimizdiń orman sharýashylyǵy salasynda birqatar ǵylymi zertteý júrgizilip jatyr. Sonyń biri - Aral teńiziniń qurǵaǵan túbinde fitomeliorativ tehnologiiasy arqyly aǵash otyrǵyzý múmkindigi. Jańa tehnologiianyń kómegimen aǵash otyrǵyzyp, ósimdik túrlerin egý teńizden bólinetin shań men tuzdyń azaiýyna jáne jergilikti halyq zardap shegip jatqan syrqat túrleriniń tómendeýine yqpal etedi. Sondai-aq, jańa jaiylym jerleriniń paida bolýyna múmkindik jasaidy. Tiisinshe Aral aimaǵyndaǵy ekologiialyq jaǵdai da jaqsara túsedi. Táýelsizdik jyldary keýip qalǵan Aral teńizinde 100 myń gektardan astam jerge sekseýil otyrǵyzyldy», - dedi Nysanbaev elordada ótken «Táýelsizdik jáne Qazaqstannyń agroónerkásip kesheniniń damýy» atty konferentsiia barysynda.
Sondai-aq, spiker elorda mańyndaǵy jasyl beldeý boiynsha da birshama jumys atqarylǵanyn alǵa tartty.
«Elorda irgesindegi jasyl beldeý topyraq quramyn jaqsartý, onyń tuzdanýyn azaitý jáne qunarlylyǵyn arttyrý boiynsha eksperimentter júrgizildi. Jáne ondaǵy ósimdikter men aǵashtardyń ósýine kedergi keltiretin aramshóptermen kúresý maqsatynda gerbitsidterdi qoldaný ádisteri zertteldi. Sol siiaqty jasyl beldeý aýmaǵynda orman-saiabaq landshaftaryn jasaý boiynsha usynystar ázirlendi. Ǵalymdar jumysynyń arqasynda 100 myń gektarǵa jýyq jerge 28 túrli aǵash túri otyrǵyzyldy. Qazirgi ýaqytta jasyl beldeý aýmaǵynda elorda turǵyndary men qala qonaqtary úshin demalýǵa jaǵdai jasalǵan», - deidi ol.
Odan bólek, E. Nysanbaev otandyq ǵalymdardyń sirek kezdesetin jáne joiylý qaýpi bar aǵash tuqymdary úshin «invitro» ósirý ádisin oilap tapqanyn aitty.
Onyń sózinshe, atalǵan ádis bioalýandyqty qamtamasyz etý úshin mańyzdy.
