«Qairat» komandasy men Qazaqstan ulttyq quramasynyń qorǵaýshysy Ian Vorogovskii Belgiia komandasyna aýysty, dep habarlaidy Baq.kz agenttigi.
Seidahmet kelgenimen, «Qairattyń» ulttyq quramada dop tebetin bir fýtbolshysy shetel asty. Naqtyraq aitsaq, qorǵaýshy Ian Vorogovskii Belgiianyń «Beershot» klýbymen kelisimshart jasasty.
Elimizdegi talantty fýtbolshylardyń biri sanalatyn qaptaldaǵy qorǵaýshy, Almaty fýtbol mektebiniń túlegi Qyzylordanyń «Qaisar» klýbynda jáne «Qairat» sapynda oinaǵan. Sondai-aq, «Suńqar» jáne «Aq Bulaq» sekildi jabylyp qalǵan komandalardyń da jeidesin kiip kórgen. 2016 jyldan beri elimizdiń ońtústik astanasynda dop teýip júr. Úsh jarym jyldyń ishinde ol «Qairatpen» birge Qazaqstan kýbogyn jáne el Sýperkýbogyn eki ret jeńip aldy.
Sońǵy jyldary ulttyq quramaǵa turaqty shaqyrylyp júr.
Ol aýysqan «Beershot» klýby Belgiianyń 12 dúrkin chempiony, ári eki márte el kýbogynda top jarǵan. Kelesi maýsymda Belgiianyń joǵary ligasynda oinaidy. Biyl ekinshi ligada oinap, joǵary ligaǵa joldama aldy.
Transfermarkt málimeti boiynsha, «Beershotpen» kelisimshart 2020 jyldyń 31 jeltoqsanyna deiin jasalǵan. Ázirge, qarjylyq málimetter jariia etilgen joq.
Ian biyl premer-ligada 12 match ótkizdi.
«Meniń Eýropa klýbyna aýysym – qazaq fýtbolynyń da álemde yqpaly bar ekenin baiqatady. Elimizdiń úzdik komandalary – «Qairat» pen «Astana» úlken resýrstarǵa ie. Qazaqstan fýtbolshylarynyń kóbisi osy eki komanda sapynda oinaǵysy keledi. Biraq men aldyǵa qadam jasaýdy jón dep taptym. Tek ózimdi ǵana emes, elimdi de tanytý úshin osyndai sheshim qabyldadym», - deidi fýtbolshy.
