Foto: egemen.kz
Qazaqstandyq fýtbol klýbtary qaqpaǵa gol salýdan góri, qazynaǵa qol salýdy jaqsy meńgergen. Bul týraly sársenbide ótken Májilis otyrysynda depýtat Nartai Sársenǵaliev málimdedi, dep habarlaidy Ult.kz.
"Álemdegi beldi dop dodasyna joldama alǵan jalǵyz klýb qalǵandaryna qorǵan bola almaidy", - dep qynjylǵan depýtat fýtbolshylarǵa bólingen qarajattyń sommasyn kórsetti.
Depýtattyń sózinshe 2025 jyly Premer-ligada dop tebetin «Ordabasy» fýtbol klýbyna 3,2 milliard teńge bólingen. «Aqtóbe» fýtbol klýbyna 2,1 milliard teńge, «Qyzyl-Jar» klýbyna 2 milliard teńge berilgen. Jalpy Premer-Ligada oinaityn fýtbol klýbynyń bári biýdjetten aqsha alady. Al «Astana» fýtbol klýby «Samuryq-Qazynadan» 2025 jylǵa 5,3 milliard teńge alǵan.
Birinshi Ligadaǵy fýtbol klýbtaryna da biýdjetten qyrýar aqsha beriledi eken. Nartai Sársenǵalievtiń aitýynsha aldy jylyna 1,2 milliard teńgeden alǵan.
"Jalpy esebin aitsam, 2025 jyly Premer-Liga fýtbol klýbtaryna 24 milliard teńge, Birinshi Ligadaǵy fýtbol klýbtaryna 7,7 milliard teńge berilgen. Sáikesinshe Qazaqstannyń qambasynan 2025 jyly fýtbolǵa 31 799 143 000 teńge jumsaldy dep resmi aitýǵa bolady. Mine, fýtbol klýbtaryn jekege bersek keminde osynsha qarajatty únemdep ony muqtaj salaǵa salýǵa bolady. Onyń biri sport salasyndaǵy jattyqtyrýshylardyń jaǵdaiy. 2025 jyly eńbek jolyn endi bastaǵan jattyqtyrýshy 117 myń teńge alsa, joǵary sanatty jattyqtyrýshy 145 115 teńgege kún kórýge májbúr. Osylaisha buqaralyq sporttyń damýyna tikelei áser etetin mamandar ailyǵyn shailyǵyna jetkize almai pushaiman hálde júr. Saldarynan sport salasyndaǵy jattyqtyrýshylar jappai bilim salasyna ketýde, sebebi ol jaqta jalaqy joǵary. Bul bir taraptyń qarjysyna ortaqtasý emes, kerisinshe jalaqyǵa jarymai júrgenderdi joǵary ailyq alatyndarmen teńestirýge úndeý", - dedi ol.
Depýtattyń usynystary:
1. Memleket basshysynyń tapsyrmasyna sáikes elimizdegi barlyq fýtbol klýbyn jedel arada jekeshelendirý qajet;
2. Qazaqstandyq fýtbol klýbtary búginge deiin qansha qarajat aldy, ony qaida jumsady, bárin tolyq tekserý kerek;
3. Úkimettiń №1193 buiryǵyna ózgeris engizip dene shynyqtyrý-sport uiymdaryndaǵy jattyqtyrýshylardyń jalaqysyn kóterý qajet.
