Rejissior Farhat Sháripovtyń «Tulǵalyq ósý treningi» kórkem filmi 41-shi Halyqaralyq Máskeý kinofestivestivalinde Gran-pri jeńip aldy. Bul týraly QR Mádeniet jáne sport ministri Arystanbek Muhamediuly Feisbýktegi paraqshasynda jazdy, dep habarlaidy "Ult aqparat".
«Bul - elimizdiń bedeli joǵary MHKF konkýrsynyń tarihynda alǵan tuńǵysh marapaty! Kartina QR Mádeniet jáne sport ministrligi tapsyrysymen «Qazaqfilm» stýdiiasynda túsirilgen. Film stsenarii Daniiar Súgiralinovtyń «Kirpichi 2.0» shyǵarmasynyń negizinde jazylǵan. «Úzdik film» nominatsiiasyndaǵy «Altyn Áýlie Georgiidi» Sháripovke qazylar alqasynyń tóraǵasy, ataqty rejissior Kim Ki Dýk tapsyrdy», - dep jazdy ministr.
Arystanbek Muhamediuly óz jazbasynda Farhat Sháripovty quttyqtady.
Áleýmettik drama qyryq jasqa kelgen, orta jas kúizelisin bastan keship júrgen bank qyzmetkeri Qanattyń ómirbaianyn baiandaidy. Onyń esh armany da, ómirden kúteri de joq. Alaida bir kúni Qanat tulǵalyq qalyptasý, kóshbasshylyq qasietterdi damytý treningine tap bolady.
«Filmniń jaryqqa shyǵýyna yqpal etken barsha adamǵa alǵys aitamyn. Aldymen otbasyma myń alǵys. Sol sebepti bul jeńisimdi ákeme arnaimyn. Al festival uiymdastyrýshylary men kórermenderine kóp rahmet», - dedi MHKF laýreaty Farhat Sháripov aǵynan jarylyp.
Eske sala ketsek, atalmysh filmniń tusaýkeseri osy jyldyń qańtar aiynda ótken edi. Otandyq prokatqa shyǵyp qoiǵan kinotýyndy Almatyda túsirilgen. Basty rólde Dýlyǵa Aqmolda men Erjan Túsipov oinaidy, sondai-aq filmge Gúljamal Qazaqbaeva, Ásel Qalieva, Filipp Voloshin jáne basqa da akterler túsken.
