3 qazannan bastap qazaqstandyq eksporttaýshylardyń shyǵyndaryn óteý jónindegi jeńildetilgen erejeleri kúshine enedi, dep habarlaidy "Ult aqparat" Saýda jáne integratsiia ministrliginiń baspasóz qyzmetine silteme jasap.
Vedomstvo eldiń shikizattyq emes eksportynyń úlesin keńeitý jáne ulǵaitý maqsatynda otandyq óńdelgen taýarlardy ilgeriletý boiynsha indýstriialyq-innovatsiialyq qyzmet sýbektileriniń shyǵyndaryn óteý jónindegi qoldanystaǵy qaǵidalarǵa birqatar túzetý engizgen.
Atalmysh erejelerde kásipkerlerdiń usynystaryn eskere otyryp, qoldaý kórsetý tártibi aitarlyqtai jetildirildi.
«Jańa erejelerde qujattar paketi ońtailandyryldy, shyǵyndardyń jańa túrli engizildi, óteletin taýarlardyń tizbesi ózektendirildi, taýardy qaita bólý deńgeiine bailanysty óteý limitterin gradatsiialaý, sondai-aq shyǵyndar úshin ótem alý kezinde kásiporyndardyń qarsy mindettemeleri qarastyrylǵan. Máselen, jol paraǵyn, túrli anyqtamalardy, fotosýretterdi jáne basqa da qujattardy usyný qajettiligi joiyldy.
Endi treiderler men distribiýtorlar, sondai-aq óńdelgen taýarlardy eksporttaityn aýyl sharýashylyǵy óndiristik kooperativteri shyǵyndardyń bir bóligin ótei alady», delingen habarlamada.
Ministrliktiń málimetinshe, syrtqy naryqtardaǵy saýda sórelerin jalǵa alý tólemine jumsalǵan shyǵyndar da óteledi.
Standarttaý úshin taýarlardy jetkizý kezinde shyǵyndardyń bir bóligin óteý limiti aǵymdaǵy qarjy jylyna bólingen qarajattyń kóleminiń buryn kórsetilgen 1/50 ornyna 75 000 AEK-ke deiin ózgertildi. Osylaisha, kepildik berilgen ótem somasy biýdjetteýge bailanysty bolmaidy.
Jańa erejelerde kásiporyndardyń qarsy mindettemeleri boiynsha máseleler de rettelgen.
Budan basqa, kásiporyndardan ótinimder endi tek elektrondy túrde qabyldanatyn bolady, bul ýaqytty únemdeýge jáne ótinish berýshilerdiń qosymsha poshta shyǵyndaryn joiýǵa múmkindik beredi.
«Shyǵyndardy óteýge ruqsat alǵan kompaniialar negizinen kórshi elderge: Reseige, Ózbekstanǵa, Qyrǵyzstanǵa, Tájikstanǵa, Qytaiǵa eksporttaidy. Sondai-aq Shveitsariia, Bangladesh, Irlandiia, Bahrein elderine shyǵýda. Sonymen qatar, shyǵyndardy óteý arqyly Afrika, Taiaý Shyǵys, Ońtústik-Shyǵys Aziia, AQSh jáne t. b. jańa naryqtarǵa shyǵý ońaiyraq bolady.
Osy memlekettik qoldaý sharalarynyń barlyǵy kásiporyndarǵa saýdada neǵurlym tiimdi jáne básekege qabiletti bolýǵa, sondai-aq ishki óndiris pen eksporttyq túsim kólemin ulǵaitýǵa múmkindik beredi. Osylaisha, salyq aýdarymdaryn ulǵaita otyryp, ulttyq ekonomikanyń damýyna, qazaqstandyqtardyń ál-aýqatynyń ósýine, áleýmettik baǵdarlamalardyń iske asyrylýyna oń serpin berý kerek, - dedi «QazIndustry» qazaqstandyq indýstriia jáne eksport ortalyǵy» AQ Basqarma tóraǵasynyń orynbasary Aidar Kákimjanov.
Jańa erejeler 2020 jylǵy 3 qazannan bastap kúshine enedi.
Ótinimderdi qabyldaýdy Saýda jáne integratsiia ministrliginiń operatory – «QazIndustry» qazaqstandyq indýstriia jáne eksport ortalyǵy export.gov.kz portaly arqyly júzege asyrady.
