Elimiz atynan synǵa túsip jatqan tankishi-jaýyngerler kezekti jarysta ekinshi oryndy ielenip, Armiia halyqaralyq oiyndarynyń «Tank biatlony» baiqaýynyń jartylai finalyna joldama aldy, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Úshinshi ekipajdyń óner kórsetýimen Qazaqstan, Qyrǵyzstan, Resei jáne Ózbekstan komandalary úshin jeke jarys aiaqtaldy.
Bul básekede de aldyńǵy kezeńdegidei qazaqstandyq komanda ekinshi ýaqytty kórsetip tek reseilik tankishilerge ese jiberdi.Úshinshi orynǵa Ózbekstan, tórtinshi orynǵa Qyrǵyzstan komandalary jaiǵasty.
Qazaqstannan kelgen jaýyngerler barlyq úsh saparda: trassadan ótý kezinde joǵary jyldamdyqty, sonymen qatar maqsattardyń dálme-dál zaqymdanýy men ekipajdardyń úilesimdi jumysyn kórsetti. Bizdiń komandanyń qarsylastary 29-30 tamyzda Ázerbaijan, Belarýs, Qytai jáne Serbiia komandalarynyń qorytyndy kezdesýlerinen keiin anyqtalady. Óz kezeginde qazaqstandyq jaýyngerler jartylai finaldyq estafetada óz sheberlikterin kórsetýi kerek. Onda ekipajdar kezekpen trassadan ótedi. Jartylai finaldyq saiystardyń jerebe tartý rásimi 30 tamyzǵa belgilengen.
Finalǵa shyǵý úshin baq synaityn estafetalyq jarys 1-2 qyrkúiekke josparlanǵan.
